Абласная бібліятэка распрацавала цыкл мерапрыемстваў, прымеркаваных да 80-годдзя Віцебскай вобласці

У 2018 годзе спаўняецца 80 гадоў Віцебскай вобласці. Віцебшчына – край з багатай гісторыяй, маляўнічымі краявідамі, працавітымі жыхарамі. Не раз гэты прыгожы кавалачак беларускай зямлі быў разрабаваны, але зноў і зноў адраджаўся да жыцця. Віцебшчына дала свету мноства выдатных мастакоў, таленавітых пісьменнікаў, музыкантаў, вынаходнікаў. Менавіта людзі – сапраўдная гордасць і скарб Віцебскай зямлі.

Віцебская абласная бібліятэка распрацавала цыкл мерапрыемстваў, прымеркаваных да 80-годдзя Віцебскай вобласці. Пра гэта расказала прысутным загадчык аддзела краязнаўчай літаратуры і бібліяграфіі Ларыса Рагачова. Прэзентацыі новых выданняў, прысвечаных роднаму краю, сустрэчы са знакамітымі людзьмі Віцебшчыны, прэзентацыі новых электронных рэсурсаў – усе гэтыя падзеі, прысвечаныя знамянальнай даце, будуць адбывацца ў бібліятэцы на працягу 2018 года. Нашаму роднаму кутку, яго жыхарам супрацоўнікі бібліятэкі прысвяцілі базы даных «Прыдзвінскі край: гісторыя і сучаснасць», «Мастакі Віцебшчыны», хутка адбудзецца прэзентацыя новай базы даных – «Чалавек года Віцебшчыны». Распрацаваны цыкл кніжных выстаў «Да 80-годдзя з часу ўтварэння Віцебскай вобласці», якія пазнаёмяць чытачоў бібліятэкі з выданнямі аб эканамічным развіцці рэгіёна, прыродных рэсурсах і ахове навакольнага асяроддзя, аб турыстычных маршрутах краю, культуры рэгіёна, шматлікіх помніках гісторыі і культуры. Мноства мерапрыемстваў будзе праводзіцца ў бібліятэках усёй вобласці.

Прысутных павіншаваў са значнай датай у гісторыі вобласці начальнік галоўнага ўпраўлення ідэалагічнай работы, культуры і па справах моладзі Віцебскага аблвыканкама Генадзь Ягораў. Вехі гісторыі Віцебшчыны прагучалі ў выступленні старшыні Віцебскага абласнога аддзялення ГА «Саюз пісьменнікаў Беларусі» Тамары Красновай-Гусачэнка.

У 2018 годзе адзначае сваё 60-годдзе літаратурна-мастацкі альманах «Дзвіна: Віцебшчына літаратурная». У далёкім 1958 годзе літаратурнае аб’яднанне пры рэдакцыі газеты «Віцебскі рабочы» выпусціла ў свет першы выпуск «Дзвіны». Сярод аўтараў першага выпуску

альманаха былі Артур Вольскі, Алесь Савіцкі, Янка Журба, Уладзімір Караткевіч, Давід Сімановіч, Анатоль Канапелька, Мікалай Дарафеенка, Ніна Дарафеенка… На старонках «Дзвіны» ўпершыню сустрэліся людзі, чыё сяброўства пазней працягнецца доўгія дзесяцігоддзі – паэты Давід Сімановіч, які ў той час быў настаўнікам Крынкоўскай школы, і Анатоль Канапелька – студэнт Полацкага настаўніцкага інстытута. Студэнтаў і рабочых, пісьменнікаў і журналістаў, людзей розных узростаў і прафесій сабрала пад адной вокладкай «Дзвіна». Для многіх з аўтараў альманах стаў першай прыступкай на шляху ў вялікую літаратуру. У альманаху друкавалі свае творы Алег Салтук, Барыс Беляжэнка, Ніна Давыдзенка, Яўгенія Мальчэўская, Тадзіяна Кляшторная… Рэдактарамі альманаха ў розныя гады былі Мікалай Споткай, Уладзімір Арлоў, Алег Салтук, Франц Сівко, Тамара Краснова-Гусачэнка.

У 2017 годзе выйшаў у свет новы, 6 выпуск «Дзвіны». Рэдактар і складальнік альманаха Тамара Краснова-Гусачэнка прачытала ўдзельнікам вечара свае новыя вершы і дала слова аўтарам альманаха. Перад прысутнымі выступілі Галіна Загурская, Ірына Радзіхоўская, Пётр Буганоў, Алена Крыклівец, Алена Фядзяева. Вершы паэта Уладзіміра Папковіча неаднаразова друкаваліся ў літаратурным альманаху. На вечары Уладзімір Антонавіч прачытаў верш з другога выпуску «Дзвіны».

Святочны вечар быў упрыгожаны цудоўным выступленнем народнага ансамбля музычных інструментаў «Контраст».

Віцебская абласная бібліятэка імя У.І. Леніна.