Абласная патрыятычная акцыя «Дарогамі спаленых вёсак» прайшла ў мемарыяльным комплексе «Шунеўка» Докшыцкага раёна
Над лесам, які прачынаўся, эхам разносіліся гукі метронома, прамяні ўзыходзячага сонца адбіваліся ў запаленых свечках памяці, спецыяльна створаныя, унікальныя карты раёнаў вобласці з назвамі спаленых вёсак нагадвалі сцягі.
Акцыя пачалася роўна а 4 гадзіне раніцы, у памяць аб тым страшным чэрвеньскім досвітку 80-гадовай даўніны. Ранічную цішыню абудзіла залівістае спяванне пеўня, свіст навостранай касы і аўтаматная чарга фашысцкіх захопнікаў, якія прыйшлі ў вёску. Усё гэта – элементы тэатралізаванай рэканструкцыі страшных падзей Вялікай Айчыннай вайны. 22 мая 1943 года ў рамках карнай аперацыі «Котбус» нямецка-фашысцкія захопнікі здзейснілі жорстокае злачынства. Вёска Шунеўка была спалена, загінула 66 мірных жыхароў, сярод іх – 15 дзетак ва ўзросце да 6 гадоў.
– У гады вайны на алтар перамогі былі прынесены дзясяткі населеных пунктаў Докшыцкага раёна, вёскі Азарцы, Залатухі і Шунеўка так і не былі адноўлены. Мемарыяльны комплекс «Шунеўка» – сімвал мужнасці, гераізму, ахвярнасці землякоў, – адзначыла намеснік старшыні Докшыцкага райвыканкама Аксана Палачаніна, звяртаючыся да ўдзельнікаў акцыі. – Усяго ж на тэрыторыі Віцебшчыны бяззваротна знікла больш за 160 населеных пунктаў, тысячы абеліскаў, мемарыялаў і брацкіх магіл сведчаць аб трагічных падзеях мінулай вайны. І сёння наша асноўная задача – беражліва захоўваць, перадаваць з пакалення ў пакаленне гісторыю Вялікай Айчыннай вайны, не дазволіць перапісаць яе старонкі, не дапусціць спроб гераізацыі нацызму, выхоўваць наступныя пакаленні на прыкладзе гераізму дзядоў і прадзедаў.
Аксана Эдуардаўна падзякавала ўсіх, хто прыняў удзел у такой важнай патрыятычнай акцыі. Складзеныя карты адгэтуль будуць захоўвацца ў Бегамльскім музеі народнай славы, філіялам якога і з'яўляецца «Шунеўка».
– На ўваходзе ў мемарыяльны комплекс напісаны словы «Ніхто не забыты, нішто не забыта». Як часта мы чуем і вымаўляем іх, часам, не ўдумваючыся ў іх глыбокі сэнс, – падкрэсліла дырэктар абласнога метадычнага цэнтра народнай творчасці Кацярына Лабука. – Памяць – гэта не толькі словы, але, перш за ўсё, нашы ўчынкі. Удзел у патрыятычнай акцыі – важны ўчынак. Ведаю, што ў многіх раёнах прайшлі мітынгі на месцах спаленых вёсак, была праведзена каласальная даследчая праца па гэтай тэме. Дзякуй усім за старанне. Пакуль мы здзяйсняем такія ўчынкі, памяць пра вайну будзе жыць у нашых сэрцах.
Удзельнікі акцыі хвілінай маўчання ўшанавалі памяць загінулых у гады Вялікай Айчыннай вайны, запалілі свечкі памяці, многія з якіх былі стылізаваныя на тэму вайны. Таксама кожны адламаў кавалачак хлеба Памяці, які сімвалізуе сувязь паміж загінулымі ў гады вайны і жывымі.
Фота Дзіяны БЕРНІКОВІЧ.