Абласное ўпраўленне МНС рыхтуе ў Віцебску свята з воднай феерыяй да Дня абароны дзяцей
Масавае мерапрыемства з воднай феерыяй і паказальнымі выступленнямі ратавальнікаў рыхтуецца ў Віцебску да Дня абароны дзяцей у ходзе рэспубліканскай прафілактычнай акцыі, паведамілі карэспандэнту БЕЛТА ва ўпраўленні МНС па вобласці.
У Міжнародны дзень сем'яў 15 мая па ўсёй краіне стартуе рэспубліканская акцыя "Не пакідайце дзяцей адных!", накіраваная на папярэджанне ўсіх магчымых няшчасных выпадкаў з дзецьмі, забеспячэнне іх агульнай бяспекі дома, на вуліцы, пры адпачынку на прыродзе і на вадаёмах. З 30 мая па 1 чэрвеня ў ходзе трэцяга этапу гэтай акцыі ў Віцебску ў пойме ракі Віцьба плануецца вялікае свята з тэматычнымі конкурсамі і гульнямі, канцэртнай праграмай і творчымі нумарамі, падрыхтаванымі сіламі членаў Беларускай маладзёжнай грамадскай арганізацыі ратавальнікаў-пажарных і клуба юных ратавальнікаў-пажарных, а таксама дэманстрацыя спецыяльнай тэхнікі і абсталявання. Работнікі ПАСА "Віцязь" рыхтуюць для дзяцей маляўнічую водную феерыю.
"Перад канікуламі мы хочам яшчэ раз нагадаць дарослым аб неабходнасці быць пільнымі і не пакідаць дзяцей без нагляду ні на хвіліну. Дзецям будзем тлумачыць праз выступленні, гульні, паказ фільмаў, як паводзіць сябе ў выпадку ўзнікнення надзвычайных сітуацый, як выклікаць пажарную службу. Пры наведванні сем'яў там, дзе ёсць парушэнні правіл пажарнай бяспекі, дзяцей нават будуць вымаць на час да іх ліквідацыі. На тэрыторыі вобласці з пачатку года ўжо двое дзяцей загінула на пажары. Ён адбыўся 12 красавіка ў Оршы: здарылася кароткае замыканне халадзільніка, і дзеці разам з маці задыхнуліся. Няшчасця магло і не быць, калі б у доме быў АПІ. Між тым, усе няшчасныя выпадкі мінулага года былі звязаны з тым, што дзяцей пакідалі адных. Гэта тычыцца і трагедый на вадаёмах: у мінулым годзе патанула пяць дзяцей, у гэтым - ужо двое дзяцей", - растлумачыў начальнік упраўлення МНС Васіль Чакан.
Акрамя таго, у рэгіёне завяршаецца яшчэ адна акцыя "За бяспеку разам", якая праходзіць па ўсёй рэспубліцы з 20 красавіка па 20 мая. Амаль усе суб'екты прафілактыкі задзейнічаны ў папярэджанні пажараў. Праводзяцца навучальныя заняткі, каб усім катэгорыям грамадзян, у першую чаргу з груп рызыкі, у выпадку ўзнікнення надзвычайнай сітуацыі своечасова была аказана неабходная дапамога. Дзякуючы прымаемым мерам на бягучы момант у вобласці адбылося на 124 пажары менш, чым за аналагічны перыяд мінулага года, і колькасць загінулых на іх знізілася на 9 чалавек.
МНС таксама правярае, як прадпрыемствы падрыхтаваліся да пажаранебяспечнага сезона, летніх сельскагаспадарчых работ. "Прымаем меры, каб не дапусціць пажараў у экасістэмах, на тарфяніках, бо лета абяцае быць засушлівым. Усім суб'ектам гаспадарання пастаўлены задачы і растлумачаны алгарытмы дзеянняў. Праведзены сумесныя вучэнні, праверана гатоўнасць тэхнікі", - дадаў Васіль Чакан.
Кацярына Князева