Абласны міжпакаленчы баль для пажылых грамадзян "Калядная сімфонія" прайшоў у Віцебску
Падобныя мерапрыемствы прайшлі па ўсёй рэспубліцы і ў кожным раёне Віцебшчыны 8 студзеня, у адзіны дзень правядзення баляў «Калядная сімфонія». Адметнай рысай балю ў абласной філармоніі стала яго міжпакаленчавая накіраванасць.
Вальс – кароль танцаў – закружыў не толькі равеснікаў з ліку прадстаўнікоў старэйшага пакалення, але і змешаныя пары.
– З дамамі з Кастрычніцкага раёна мы выканалі «Вальс пакаленняў» пад знакамітую музыку Я. Догі да фільма «Мой ласкавы і пяшчотны звер», – расказалі хлопцы-старшакласнікі з СШ № 3 ім. Л. Беліцкага. – Выступленню папярэднічалі гадзіны рэпетыцый. За гэты час мы навучыліся ўважлівасці і папярэдлівасці ў адносінах да сваіх партнёршаў.
Унісон з гэтым прызнаннем удзельнікаў балю прагучала віншаванне яго госця – намесніка старшыні аблвыканкама Вячаслава Дурнова. Ён адзначыў, што традыцыя правядзення калядных баляў задае добры культурны тон. Сталыя вучаць маладое пакаленне галантнасці, смеласці ў праяўленні узнёслых пачуццяў, успрыняццю прыгожага.
Класічную праграму падтрымалі гаспадары – артысты філармоніі. Жартлівыя сюрпрызы паднеслі члены клубаў джэнтльменаў, рух якіх набірае абароты на Віцебшчыне. Творчыя калектывы раёнаў з удзелам прадстаўнікоў залатога ўзросту прэзентавалі свае танцавальныя, пераважна вальсавыя, кампазіцыі.
Варта адзначыць, перад выхадам на танцпол больш хваляваліся кавалеры, а дамы, лёгка пурхаючы па паркеце, нібыта скідалі гады, асвятляліся ўнутраным святлом. Калядны баль – самы час памаладзець!