Абласных "Уладароў сяла" выберуць да 2 верасня

Абласныя этапы праекта "Гаспадар сяла" пройдуць з 16 жніўня па 2 верасня, паведаміла карэспандэнту БЕЛТА загадчыца аддзела праектнай дзейнасці ЦК ГА "БРСМ" Тамара Анашчанка.

У праекце прымаюць удзел пражываючыя ў сельскай мясцовасці і працуючыя ў сферы сельскай гаспадаркі не менш за тры гады маладыя сем'і з дзецьмі. У абласных турах будуць спаборнічаць пераможцы раённых этапаў.

Маладым сем'ям трэба будзе праявіць свае таленты ў васьмі конкурсах. Так, у адным з іх - "Прывітанне па-беларуску" - удзельнікі вынясуць на суд журы невялікія тэатралізаваныя замалёўкі пра адзін з дзён сваёй сям'і, сямейныя традыцыі, захапленні, хобі. Абавязковай умовай з'яўляецца прадстаўленне беларускага нацыянальнага касцюма з улікам рэгіёна пражывання сям'і. Затым маладыя сем'і адправяцца "Па дровы", запрэгуць і распрэгуць "Святочны воз", звяжуць і паставяць снапы на "Сціслай паласе", паспаборнічаюць за званне лепшых "Бульбашаў", прадставяць "Выстаўку дасягненняў падсобных гаспадарак" і накормяць журы "Сялянскімі прысмакамі". Акрамя таго, удзельнікі знімуць відэаролікі пра свае падсобныя гаспадаркі і прадставяць іх у конкурсе "Лепшае сельскае падвор'е".

Фінал, у якім сустрэнуцца пераможцы абласных этапаў праекта, адбудзецца падчас рэспубліканскага фестывалю-кірмашу працаўнікоў вёскі "Дажынкі-2013" у Жлобіне.

Рэспубліканскі сямейны сельскагаспадарчы праект "Гаспадар сяла", які спрыяе замацаванню маладых сем'яў на вёсцы, папулярызацыі сельскагаспадарчай працы, адраджэнню працоўных дынастый і ўмацаванню інстытута сям'і, праходзіць у Беларусі з 2008 года. Праект складаецца з трох асноўных этапаў: раённага, абласнога і фінальнага - рэспубліканскага, што дазваляе прыцягнуць да ўдзелу ў праекце максімальную колькасць маладых сем'яў.

Арганізатарамі выступаюць ГА "Беларускі рэспубліканскі саюз моладзі", Міністэрства сельскай гаспадаркі і харчавання, ААТ "Белаграпрамбанк", ГА "Беларускі саюз жанчын".