Грамадзкае абмеркаваньне па далучэньні Рубы да Віцебску падыходзіць да завяршэньня

Пакуль юрыдычна тэрытарыяльна пасёлак, з колькасцю насельніцтва ў сем тысяч чалавек, знаходзіцца ў Віцебскім раёне, а адміністрацыйна з 1997 года ўваходзіць у склад Чыгуначнага раёна Віцебска. Сітуацыя супярэчлівая і не адпавядае дзеючаму Закону Рэспублікі Беларусь ад 5 мая 1998 г. "Аб адміністрацыйна-тэрытарыяльным устройстве Рэспублікі Беларусь".

Так, адрасы, пазначаныя ў пашпартах рубаўцаў, пачынаюцца аднолькава: Віцебская вобласць, Віцебскі раён, г.п. Руба, а вось галоўны для любога жыхара краіны дакумент яны афармляюць і атрымліваюць у аддзяленні па грамадзянстве і міграцыі АУС Чыгуначнага раёна Віцебска. Мясцовыя вучні ходзяць у сярэднія школы №15 і №9, размешчаныя на тэрыторыі раёна ў Рубе і вярхоўі, але якія знаходзяцца ў падпарадкаванні аддзела адукацыі, спорту і турызму адміністрацыі Чыгуначнага раёна. У гарадской камунальнай уласнасці і аб'екты аховы здароўя, віцебскае ЖКГ займаецца абслугоўваннем жылфонду.

Акрамя таго, у пасёлак ужо даўно ходзіць гарадскі грамадскі транспарт – аўтобус №26 і 42-я маршрутка, што многім канчаткова дазволіла лічыць сябе «несельскімі». Затое, да прыкладу, крэдыты на будаўніцтва жылля некаторыя бралі пад льготныя «сельскія» працэнты, ды і мясцовым органам улады ў населеным пункце да гэтага часу з'яўляецца Рубоўскі пасялковы Савет дэпутатаў, а яго вышэйстаячай інстанцыяй – гарадскі Савет дэпутатаў.

– З улікам усіх гэтых абставін, дзеючага заканадаўства і меркавання грамадзян неабходна канчаткова вызначыць адзінае адміністрацыйна-тэрытарыяльнае становішча г.п. Руба і пасёлка Вярхоўе: або горад Віцебск, або Віцебскі раён. Гэта дазволіць уніфікаваць кіраванне рознымі сферамі жыццезабеспячэння насельніцтва, больш аператыўна, мэтанакіравана і комплексна вырашаць пытанні сацыяльна-эканамічнага развіцця тэрыторыі.

За час абмеркавання ў пасялковы Савет звярнуліся каля 800 грамадзян, і ўсе яны аднагалосна выказаліся за далучэнне да Віцебска. Таксама жыхары пасёлка маглі выказаць сваю кропку гледжання ў пісьмовай форме і адправіць у гарадскі Савет дэпутатаў або на электронны адрас гарвыканкама.

Вынікі грамадскага абмеркавання будуць падведзены пазней, аднак я не думаю, што вынікі кагосьці здзівяць: большасць будзе ўсё ж такі за зліццё з абласным цэнтрам, – распавядае старшыня пассавета Андрэй Бурда.

Цікавімся ў Андрэя Барысавіча, як зменіцца жыццё насельніцтва, калі будзе прынята рашэнне аб адміністрацыйна-тэрытарыяльным уваходжанні Рубы ў склад Віцебска.

– Звычайныя жыхары гэтага практычна не заўважаць. Афіцыйна і юрыдычна ўзаконяць сітуацыю, якая склалася на практыцы. Адзінае, на мой погляд, істотнае змяненне – за непатрэбнасцю скасуюць пасялковы Савет, яго функцыі пяройдуць у кампетэнцыю адміністрацыі Чыгуначнага раёна Віцебска, – лічыць старшыня і дадае, што кропку ў пытанні статусу Рубы можна ставіць толькі пасля прыняцця адпаведнага нарматыўна-прававога дакумента.

Наталля Камлёва, «Віцебскія весці».