Каля 300 работ прадставілі юныя жыхары Віцебскай вобласці на конкурс экалагічнага малюнка

 

 

 

 

 

 

 

 

 

 

 

 

Каля 300 работ прадставілі юныя жыхары Віцебскай вобласці на конкурс экалагічнага малюнка, паведамілі карэспандэнту БЕЛТА ў Віцебскім абласным камітэце прыродных рэсурсаў і аховы навакольнага асяроддзя.

Усяго на абласны этап рэспубліканскага конкурсу на лепшы дзіцячы малюнак на экалагічную тэматыку паступіла 263 малюнкі і 35 аплікацый з усіх рэгіёнаў Віцебскай вобласці. "У сваіх працах дзеці адлюстравалі шматгранную прыгажосць нашай планеты, акцэнтавалі ўвагу на сучасных экалагічных пагрозах, уплыве антрапагеннага фактару. У кожнай з іх адчуваецца заклік любіць і берагчы сваю прыроду", - падкрэслілі ў камітэце, адзначыўшы асаблівы каларыт работ выхаванцаў і навучэнцаў устаноў адукацыі Віцебска, Наваполацка, Віцебскага, Сенненскага, Браслаўскага, Верхнядзвінскага, Бешанковіцкага і Чашніцкага раёнаў.

Пераможцы абласнога этапу ўжо вызначаны. У узроставай групе ад 3 да 5 гадоў першае месца за малюнак "Дапаможам нашым пернатым сябрам" прысуджана пяцігадовай Анастасіі Косапалікавай, выхаванцы Верхнядзвінскага дзяржаўнага ясляў-сада №4. У узроставай групе ад 6 да 10 гадоў упэўненую перамогу атрымаў малюнак "Летні вечар" 7-гадовай Сафіі Папраўка, вучаніцы Дзіцячай мастацкай школы ім. І.Ф.Хруцкага Наваполацка.

Работы пераможцаў і прызёраў абласнога конкурсу да 1 красавіка будуць накіраваны ў рэспубліканскі аргкамітэт конкурсу для ўдзелу ў заключным этапе, вынікі якога стануць вядомыя ў пачатку мая.