Каля 40 устаноў адукацыі Віцебскай вобласці прадставяць прадукцыю на восеньскім кірмашы

Каля 40 устаноў адукацыі рэгіёна прадставяць сваю прадукцыю на традыцыйным восеньскім кірмашы "Восеньскі карагод" у Віцебску 26 верасня. Пра гэта паведаміў сёння на брыфінгу начальнік галоўнага ўпраўлення па адукацыі Віцебскага аблвыканкама Дзмітрый Хома.

У гэты дзень горад на Дзвіне прыме абласное свята працаўнікоў вёскі "Дажынкі", таму заўсёды цікавы кірмаш устаноў адукацыі сёлета будзе адрознівацца яшчэ большай насычанасцю і разнастайнасцю. Традыцыйна шырокі блок прапанаванай сельскагаспадарчай прадукцыі, выгадаванай на прышкольных участках, выпечкі, тавараў бытавога і гаспадарчага прызначэння дапоўніць пляцоўка, дзе навучэнцы сістэмы прафтэхадукацыі рэгіёна прэзентуюць свае ўменні і навыкі.

"Літаральна ўчора адбылося падвядзенне вынікаў IV Рэспубліканскага конкурсу прафесійнага майстэрства WorldSkills Belarus. У Віцебскай вобласці 14 пераможцаў. Рабяты прадэманструюць наведвальнікам кірмашу высокі ўзровень майстэрства, - адзначыў Дзмітрый Хома. - Вылучым таксама асобную зону, дзе будуць аказвацца розныя паслугі насельніцтву. Мы плануем, што гэта будзе дробны рамонт адзення, абутку. Разглядаецца пытанне аб магчымасці аказання цырульняў і манікюрных паслуг і шэрагу іншых".

Акрамя таго, запланавана вялікая колькасць мерапрыемстваў з роставымі лялькамі, тэматычныя пляцоўкі, гульнявыя зоны для дзяцей, творчыя выступленні.

Кірмаш будзе працаваць на пляцоўцы ля Палаца спорту з 8.00 да 15.00.

Па словах першага намесніка старшыні Віцебскага гарвыканкама Валянціна Цветкава, для больш поўнага забеспячэння жыхароў горада сельскагаспадарчай прадукцыяй 26 верасня будуць арганізаваны яшчэ тры дадатковыя сельскагаспадарчыя кірмашы. Яны разгорнуцца ў мікрараёне Білева, на Пралетарскай плошчы і на скрыжаванні пр.Будаўнікоў і вул.Воінаў-Інтэрнацыяналістаў.

БЕЛТА.