Каля 500 пар Дзядоў Марозаў, Снягурак і 750 іншых казачных персанажаў узялі ўдзел у парадзе ў Віцебску
Тратуары па ходзе руху пераапранутых былі запоўнены
людзьмі. Некаторыя з гледачоў таксама надзелі карнавальныя маскі, каб падтрымаць
тых, хто ішоў у святочнай калоне. А ўзначальвалі яе тры зімовых месяцы – Снежань,
Студзень і Люты. Іх прадстаўлялі вершнікі на конях, услед за якімі ў калясцы ехалі
Галоўны Дзед Мароз Віцебскай вобласці са Снягуркай. А фурманам быў сімвал 2017
года – Чырвоны певень.
Рытм шэсцю задаваў ваенны духавы аркестр. Музыканты таксама надзелі касцюмы Дзядоў Марозаў і гралі вясёлыя маршы. Так з музыкай калона ўступіла на плошчу Перамогі, дзе ўсталявана галоўная ёлка Прыдзвінскага краю.
Добрай традыцыяй акцыі «Запалім елку разам!» стала
ўшанаванне таленавітай моладзі Віцебска, тых, хто праславіў Прыдзвінскі край
перамогамі ў розных конкурсах, алімпіядах і чэмпіянатах.
Сярод іх уладальнік дыплома I ступені міжнароднай
шматпрофільнай дыстанцыйнай алімпіяды «Тэнгры» па хіміі і дыплома III ступені
рэспубліканскай алімпіяды па біялогіі Аляксандр Атанаў, пераможца другога
этапу рэспубліканскай алімпіяды па гісторыі і грамадазнаўстве, чэмпіён Беларусі
і прызёр чэмпіянату Еўропы па ўсходніх адзінаборствах Елізавета Коўчур,
выдатніца вучобы, пераможца песеннага конкурсу «Дзве сястры – Беларусь і
Расія», міжнароднага фальклорнага фестывалю ў Польшчы і Аrt-Panorama
Baltika – 2016, які праходзіў у Латвіі, Эстоніі і Швецыі, Аліна Кушнерава і
іншыя. Усе дзесяць юных герояў урачыстасці атрымалі падарункі.
Кульмінацыяй вечара стала запальванне елкі. Каля
навагодняй прыгажуні водзілі карагоды, ладзілі конкурсы, на сцэне выступілі лепшыя творчыя калектывы і выканаўцы.
А Дзеды Марозы з задавальненнем фатаграфаваліся з
малышамі і дарослымі, і рабілі селфі на фоне лясной прыгажуні, што заззяла рознакаляровымі агнямі.
Таццяна Пастэрнак. Фота Дзмітрыя ОСІПАВА. «Віцебскія вясці».