Каля 600 удзельнікаў збярэ міжнародны лагер "Бе-La-Русь" у Верхнядзвінскім раёне

22 ліпеня, Віцебск /Вольга Багачова - БЕЛТА/. Міжнародны лагер "Бе-La-Русь" адкрываецца 28 ліпеня на Кургане Дружбы ў Верхнядзвінскім раёне Віцебскай вобласці, паведамілі карэспандэнту БЕЛТА ў абласным камітэце БРСМ.

Юбілейны XX збор моладзі Беларусі, Латвіі і Расіі прысвечаны Году расійскай космонаўтыкі, 50-годдзю палёту ў космас Юрыя Гагарына і 20-годдзю Расійскай саюзу моладзі. У гонар гэтых падзей удзельнікі лагера, а гэта каля 600 чалавек, увялі нават спецыяльную касмічную тэрміналогію. Так, палявы лагер у спецыяльным слоўніку моладзі пазначаны як зорны гарадок, пляцоўка каля галоўнай сцэны стала космодромам, футбольнае поле - стыковачным адсекам, паляна носіць абазначэнне міжнароднай касмічнай станцыі, а ганаровае званне камандзіра МКС носіць кіраўнік "Бе-La-Русі".

На працягу трох дзён маладыя людзі будуць спаборнічаць у розных творчых і спартыўных конкурсах: "экіпажы" збяруцца ў футболе, валейболе, конкурсе сілачоў, армрэстлінгу, мяшковай барацьбе. Традыцыйна пройдзе фотакрос, бітва дыджэяў, конкурс "Бе-La-Русские зори", будзе абрана лепшая пара лагера. Таксама ўдзельнікі змогуць праявіць сябе ў класічным трэнінгу камандаўтварэння "Вяровачны курс", сюжэтна-ролевай гульні-квесте "Наш космас". Самыя спартыўныя і таленавітыя касманаўты будуць з гонарам занесены ў "Кнігу рэкордаў лагера-2011".

Закрыццё лагера адбудзецца 31 ліпеня.

Арганізатарамі мерапрыемства выступаюць Беларускі рэспубліканскі саюз моладзі, Саюз за прагрэс моладзі Латвіі і Расійскі саюз моладзі. Сустрэча актывістаў маладзёжных арганізацый заклікана спрыяць фарміраванню дакладнай жыццёвай пазіцыі маладых людзей і іх узаемадзеянню, выхоўваць пачуццё патрыятызму.-0-