Каля Br1 трлн. інвеставана ў развіццё інфраструктуры гандлю Віцебска за тры гады
У развіццё інфраструктуры галіны гандлю Віцебска за тры гады інвеставана каля Br1 трлн., паведаміла карэспандэнту БЕЛТА намеснік старшыні Віцебскага гарвыканкама Зінаіда Каралёва.
Сёння ў абласным цэнтры функцыянуе 2,4 тыс. аб'ектаў гандлю і грамадскага харчавання, 11 гандлёвых цэнтраў і 7 рынкаў. Большасць - аб'екты прыватнай формы ўласнасці. У разліку на 1 тыс. жыхароў забяспечанасць гандлёвымі плошчамі павялічылася з 353 кв.м у 2009 годзе да 510 кв.м на 1 красавіка гэтага года, месцамі агульнадаступнай сеткі грамадскага харчавання - адпаведна з 22,4 месцаў да 35,5. "Гэтыя паказчыкі дасягнуты за кошт рэканструкцыі і мадэрнізацыі дзеючых аб'ектаў, будаўніцтва новых", - падкрэсліла Зінаіда Каралёва.
У горадзе працягваецца праца па забеспячэнні збалансаванага попыту і прапановы на спажывецкім рынку, удасканальваецца матэрыяльна-тэхнічная база прадпрыемстваў гандлю, укараняюцца новыя формы і метады продажаў.
Каля 35% рознічнага абароту Віцебскай вобласці прыпадае на Віцебск. На працягу апошніх трох гадоў штогадовы прырост рознічнага тавараабароту абласнога цэнтра складае не менш за 15%, за першы квартал гэтага года - 19,5%. У даляравым эквіваленце рознічны тавараабарот на душу насельніцтва склаў у 2012 годзе $2,8 тыс., з улікам першага квартала гэты паказчык пралічваецца на ўзроўні не менш за $4 тыс. Эфектыўнасць працы гандлёвых прадпрыемстваў горада характарызуецца пазітыўнай дынамікай рэнтабельнасці продажаў. Па папярэдніх даных, за студзень-сакавік па галіне будзе атрымана не менш Br45 млрд. чыстага прыбытку.
Зінаіда Каралёва таксама адзначыла, што з'яўленне на спажывецкім рынку горада новых аператараў выклікае канкурэнцыю паміж буйнымі гандлёвымі аб'ектамі і крамамі крокавай даступнасці. У абласным цэнтры дзейнічаюць шэсць крам сеткі "Еўраопт" агульнай гандлёвай плошчай звыш 9 тыс. кв.м. Іх доля ў рознічным тавараабароце Віцебска - больш за 11%. Аб'екты размешчаны на магістральных вуліцах, адпавядаюць сучасным патрабаванням у частцы архітэктурных рашэнняў. У кастрычніку 2011 года на ўездзе ў горад адкрыўся гандлёвы цэнтр "Карона" ТАА "Тытунь-інвест". У канцы мінулага года на спажывецкім рынку Віцебска з'явіліся аб'екты гандлёвай сеткі "Родная старана", а ў бягучым - гандлёвай сеткі "Суседзі". Набірае абароты гандлёвая сетка "Міла", аб'екты якой размешчаны, як правіла, у жылых дамах і прапануюць пакупнікам шырокі асартымент парфумерна-касметычных тавараў і бытавой хіміі.
Акрамя таго, рэалізуюцца інвестдагаворы і будуюцца гандлёвыя аб'екты сеткі "Рапа", вядуцца перамовы з беларуска-літоўскай кампаніяй "Рывона" па будаўніцтве аб'ектаў гандлёвай сеткі "Норфа". Такім чынам, у 2013-2014 гадах у абласным цэнтры з'явяцца і іншыя аператары.
"Гэта з'яўляецца стымулам для гандлёвых арганізацый, якія даўно функцыянуюць на спажывецкім рынку Віцебска, крамы якіх цалкам трапляюць пад вызначэнне "крама крокавай даступнасці", шукаць новыя падыходы ў развіцці", - падкрэсліла намеснік старшыні гарвыканкама.
Напрыклад, актыўна вядзецца работа па мадэрнізацыі, рэканструкцыі і будаўніцтве гандлёвых аб'ектаў ААТ "Віцебскія прадукты", у сетцы якога 31 крама. Працягваецца будаўніцтва яшчэ аднаго аб'екта, увод яго ў эксплуатацыю намечаны на 2013 год. Яшчэ два аб'екты гандлю плануе адкрыць у гэтым годзе ААТ "Веста" (усяго 51 крама, удзельная вага ў тавараабароце горада - больш за 11%).
У горадзе працягваецца вывад з жылога фонду кватэр, размешчаных на першых паверхах. Пасля рэканструкцыі на гэтых плошчах адкрываюцца аб'екты сферы паслуг і гандлю фармату крокавай даступнасці.
"У цэлым Віцебскі гарвыканкам у роўнай ступені падтрымлівае і стымулюе ў развіцці як буйныя гандлёвыя сеткі, так і невялікія гандлёвыя аб'екты. Асноўныя патрабаванні да гандлёвых аператараў - высокая культура і якасць абслугоўвання пакупнікоў, насычанасць гандлёвай сеткі, у тым ліку таварамі вытворцаў абласнога цэнтра і вобласці, лаяльны цэнавы фактар, стымулюючыя меры ў аплаце працы работнікаў і бескаштоўная дзейнасць", - адзначыла Зінаіда Каралёва.