Каля Br9,5 млрд накіруюць у Віцебскай вобласці ў 2014 годзе на добраўпарадкаванне воінскіх пахаванняў

У Віцебскай вобласці на рамонт і добраўпарадкаванне воінскіх пахаванняў у 2014 годзе накіруюць каля Br9,5 млрд, паведамілі карэспандэнту БЕЛТА ў Віцебскім аблвыканкаме.

Віцебскі гарвыканкам, адміністрацыі раёнаў абласнога цэнтра плануюць правесці маштабныя работы па рэканструкцыі мемарыяльных могілак на вул. Цітова, рамонце воінскіх пахаванняў на Успенскай горцы, рэстаўрацыі бюста Героя Савецкага Саюза М.Ф. Шмырова, рамонце помніка Герою Савецкага Саюза В.А. Гараўцу.

У Полацкім раёне з-за вялікага аб'ёму і кошту работ праект па стварэнні мемарыяльнага комплексу "Урочышча Пяскі" плануецца рэалізаваць у некалькі этапаў. На першым трэба будзе добраўпарадкаваць пад'язныя шляхі да мемарыяльнага комплексу. У Віцебскім раёне велізарную працу неабходна правесці па нанясенні ўстаноўленых прозвішчаў абаронцаў Айчыны, якія загінулі на тэрыторыі раёна (каля 30 тыс. прозвішчаў).

Вызначаны комплекс работ па добраўпарадкаванні месцаў воінскай славы і воінскіх пахаванняў запланавана правесці і ў іншых рэгіёнах вобласці. Самы актыўны ўдзел у гэтых мерапрыемствах прыме студэнцкая моладзь і школьнікі.

У мінулым годзе з абласнога бюджэту на рамонт, добраўпарадкаванне, устаноўку пліт і нанясенне на іх прозвішчаў абаронцаў Айчыны было накіравана Br4,4 млрд. За кошт гэтых сродкаў адрамантаваны 60 мемарыяльных комплексаў, устаноўлены 82 мемарыяльныя пліты з нанясеннем на іх 1 159 прозвішчаў абаронцаў Айчыны. Найбольшыя аб'ёмы работ былі выкананы ў Браслаўскім, Віцебскім, Лёзненскім, Міёрскім, Гарадоцкім раёнах.

На тэрыторыі вобласці знаходзяцца больш за 2,5 тыс. мемарыяльных комплексаў, месцаў баявой і воінскай славы, пахаванняў воінаў і партызан Вялікай Айчыннай вайны, пахаванняў у месцах масавай гібелі грамадзянскага насельніцтва, у тым ліку 1 243 воінскія пахаванні, у якіх пахавана больш за 390 тыс. абаронцаў Айчыны, 207 тыс. чалавек з якіх невядомыя. На сённяшні дзень многія помнікі, абеліскі і манументы, вырабленыя больш за 50 гадоў таму з нядоўгавечных матэрыялаў, патрабуюць значных фінансавых сродкаў на рамонт. Паводле інфармацыі гар- і райвыканкамаў, патрэбнасць складае звыш Br16 млрд.

Вольга Багачова