Каля сотні жыхароў Віцебскай вобласці вызвалены ад выплаты збору па дэкрэце №3

"Разглядам заяў грамадзян аб вызваленні ад выплаты збору на фінансаванне дзяржрасходаў у сувязі з цяжкім жыццёвым становішчам займаюцца адміністрацыі па месцы рэгістрацыі. Але магу паведаміць агульную лічбу на 6 лютага - 93 чалавекі па ўсёй вобласці атрымалі станоўчы адказ, гэта значыць вызвалены ад выплаты. Асноўная маса заяў прыходзіцца на Віцебск, дзе зарэгістравана больш за ўсё плацельшчыкаў дадзенага збору ў рэгіёне", - адзначыла Таццяна Ліпская.

Віцебскі гарадскі Савет дэпутатаў дэлегаваў выканкаму права на вызваленне грамадзян ад выплаты збору. Гэтай працай займаецца гарадская камісія па разглядзе заяў юрыдычных і фізічных асоб, індывідуальных прадпрымальнікаў аб прадастаўленні падатковых ільгот і дзяржпадтрымкі. У яе склад уваходзяць прадстаўнікі падатковай службы, дэпутацкага корпуса, юрыдычнага і фінансавага аддзелаў, упраўлення па працы, занятасці і сацыяльнай абароне на чале з намеснікам старшыні гарвыканкама Зінаідай Каралёвай. За гэты час паступіла каля 300 заяў, з іх амаль сотня ўжо разгледжаны, але і новыя працягваюць паступаць у службу "Адно акно".

"Крайні тэрмін - 19 лютага, таму пасяджэнні праводзяцца ўсё часцей. У студзені заяў было яшчэ няшмат, і мы знаёміліся асабіста з заяўнікамі. Цяпер за адно пасяджэнне даводзіцца разглядаць больш за 20 розных жыццёвых сітуацый. З першай сотні прыкладна 60% заяўнікаў было адмоўлена, так як не было падстаў, у тым ліку пацверджаных дакументальна, прызнаць жыццёвую сітуацыю цяжкай. А такой мы прызнаем наяўнасць сур'ёзнай хваробы, утрыманцаў, напрыклад, хворых сваякоў і падобныя абставіны. Так, мы вызвалілі ад выплаты збору былую правадніцу, якой давялося звольніцца, каб даглядаць за хворымі бацькамі", - адзначыла Зінаіда Каралёва.

На пасяджэнні, якое адбылося сёння,разгледжана каля 30 заяў. Некалькі былі адкладзены для праверкі наяўнасці парушэнняў заканадаўства аб занятасці. У 16 выпадках людзям адмоўлена. Двое грамадзян вызвалены ад выплаты 50% збору, яшчэ пяцёра - цалкам. "Сярод тых, хто лічыць магчымым ухіліцца ад фінансавання дзяржрасходаў, - шмат маладых. Гэта людзі пераважна 1990-х, 1980-х гадоў нараджэння. У многіх даўно не было ніякіх запісаў у працоўнай кніжцы. Часта даводзіцца адмаўляць, таму што чалавек быў зняты з уліку ў службе занятасці за парушэнні - адмову ад прапанаваных варыянтаў працаўладкавання, ад удзелу ў абавязковых грамадскіх работах і так далей. Прычым нават калі чалавек самастойна знайшоў працу, але не паведаміў службу занятасці, каб зняцца з уліку, - гэта таксама парушэнне закона", - дадала Зінаіда Каралёва. Члены камісіі падкрэсліваюць, што даведкі з месца працы за межамі Беларусі (у асноўным гэта Расія) правяраюцца падатковымі органамі. Таму сумнеўныя дакументы, зарэгістраваныя заднім чыслом, ухіліцца ад выплаты збору не дапамогуць. Усяго у Віцебскай вобласці было накіравана каля 61 тыс. паведамленняў, найбольшая колькасць - жыхарам Віцебска (каля 21 тыс.).

Кацярына Князева - БелТА.