ТАА «Белль Бимбо плюс» прадставіць новыя калекцыі дзіцячага адзення ў Маскве

У расійскай сталіцы ў ЦВК «Экспацэнтр» 22 — 25 верасня адбудзецца 15-я міжнародная выстава «CJF — Дзіцячая мода-2015. Восень». Яна цяпер праводзіцца два разы на год і спрыяе не толькі ўмацаванню ўжо складзеных сувязяў з партнёрамі, але і заключэнню новых дагавораў. Як сцвярджаюць арганізатары, гэта ўнікальны інструмент камунікацыі прафесіяналаў індустрыі моды, разлічанай на падрастаючае пакаленне. Праведзеныя маркетынгавыя даследаванні кажуць аб высокай зацікаўленасці байераў (тых, хто займаецца закупкамі актуальных серый адзення і абутку) у развіцці такіх спецыялізаваных форумаў, прысвечаных вырабам для дзяцей, юнацтва і будучых мам.

Навінкі сезона прадставіць у Маскве і добра вядомае прыдзвінцам ТАА «Белль Бімбо плюс». Кампанія плануе прэзентаваць на выставе свае калекцыі восень-зіма 2015/2016: мадэлі для дзяцей да 14 гадоў гандлёвай маркі «Bell Bimbo» і ўборы для самых маленькіх брэнда «Бимоша». Сучаснае верхняе адзенне для юных моднікаў, як растлумачыла начальнік аддзела забеспячэння прадпрыемства Вольга Васкецова, вырабляецца з выкарыстаннем мембраннай тканіны, якая дзякуючы асаблівай структуры валодае вода- і брудаадштурхвальнымі, ветраахоўнымі ўласцівасцямі і здольнасцю выводзіць лішнюю вільгаць ад цела. Што тычыцца каляровай гамы, то ў чарговым восеньска-зімовым сезоне актуальнымі будуць насычаныя адценні: шэры, карычневы, смарагдавы, сіні, пурпурны. Асаблівай нотай у калекцыях гучыць такі тон, як блакітны лёд.

Акрамя таго, ТАА «Белль Бімбо плюс» пакажа на выставе ўжо знаёмае спажыўцам адзенне з арганічнага бавоўны гандлёвай маркі «Бимоша эко», прызначанае для неданошаных і малаіх па вазе нованароджаных.

Лілія Іўчанка, «Віцебскія весці».