Аршанскі інструментальны завод правёў Дзень адчыненых дзвярэй
Мерапрыемства адкрыў святочны канцэрт, а затым гасцей пазнаёмілі з гісторыяй прадпрыемства. Да выпуску металарэжучага інструмента на заводзе прыступілі ў красавіку 1974 года. У 2014-2016 гадах з-за зніжэння попыту аб'ём вытворчасці прадукцыі значна скараціўся, што прывяло прадпрыемства на грань банкруцтва. Вясной 2017-га на вышэйшым дзяржаўным узроўні было прынята рашэнне падтрымаць завод. Гэта стала вызначальным для вытворчасці і калектыву. Да цяперашняга часу мадэрнізаваны асноўны вытворчы корпус. 18 лютага бягучага года ААТ "Аршанскі інструментальны завод" увайшоў у склад холдынгу "МТЗ-Холдынг". Як адзначыў дырэктар завода Віталь Манкевіч, асноўная праца па стварэнні высокатэхналагічнай вытворчасці яшчэ наперадзе. Цяпер на прадпрыемстве ідзе рэалізацыя інвестпраекта з агульным аб'ёмам інвестыцый у Br40 млн па стварэнні вытворчасці сучаснага металарэжучага і дапаможнага інструмента з укараненнем інавацыйных тэхналагічных працэсаў. Праект, разлічаны на 2018-2023 гады, рэалізуецца ў два этапы.
"На першым этапе асвоена Br10 млн за
мінулы год, яшчэ Br5 млн заplanвана на бягучы. Замоўлена 25 розных
станкоў, якія ўжо паступаюць на завод. Уведзены ў эксплуатацыю два фрэзерных
станка гомельскай вытворчасці, шэсць кампрэсараў і іншае абсталяванне.
Абнаўленне дазволіць нам закрыць вузкія месцы і павялічыць аб'ёмы выпускаемага
зараз інструмента", - распавядае кіраўнік прадпрыемства.
Другі этап будзе рэалізаваны сумесна з
замежнай кампаніяй-партнёрам. "Над дагаворам аб супрацоўніцтве мы зараз
працуем. Яны прадаставяць тэхналогію, правядуць навучанне спецыялістаў, возьмуць
на сябе іншы функцыянал, што дазволіць наладзіць выпуск самага сучаснага інструмента.
Цяпер на прадпрыемстве працуюць каля 400 чалавек. З улікам наяўных планаў па мадэрнізацыі і пашырэнні сумесна з кіруючай кампаніяй распрацаваны яшчэ тры бізнес-праекты, якія будуць фінансавацца холдынгам "МТЗ-Холдынг". Першы датычыцца стварэння шматфункцыянальнага сэрвіснага цэнтра. З 1 красавіка ён прыступіў да працы: на абслугоўванні Аршанскага інструментальнага завода ўжо знаходзіцца 16 трактароў, у далейшым іх колькасць будзе расці. Другі праект - арганізацыя серыйнай вытворчасці гідрапад'ёмнікаў для гідранавесной сістэмы трактароў "Беларус" серый 900, 1000 і 1200. Першы прататып вырабы створаны, ідзе абкатка тэхналогіі яго вытворчасці, серыйны выпуск плануецца пачаць у верасні. Трэці праект звязаны з выпускам чарвячных фрэз і долбякоў. "І пад усё гэта патрэбны працоўныя рукі. У першую чаргу высокакваліфікаваныя кадры. Таму мы зараз хочам паказаць: што ў нас адбываецца: завод мяняецца ў лепшы бок звонку і ўнутры, з верасня мінулага года вырас аб'ём вытворчасці", - распавядае дырэктар.
Значнасць правядзення Дня адкрытых дзвярэй падкрэсліў памочнік Прэзідэнта - інспектар па Віцебскай вобласці Віталь Воўк. На яго думку, удзел у такіх мерапрыемствах дазваляе моладзі пазнаёміцца з вытворчасцю і свядома зрабіць свой выбар будучага месца працы.
"Што тычыцца працы прамысловага комплексу, то тут важна выкарыстоўваць самы сучасны інструмент. І ў гэтым роля Аршанскага завода відавочная, бо гэта галоўная айчынная вытворчасць універсальных інструментаў для станкабудаўнічых прадпрыемстваў Беларусі. Іх актыўная мадэрнізацыя патрабуе адпаведнага кроку і ад аршанцаў. Таму мы будзем ствараць тут якасна новую вытворчасць", - адзначыў Віталь Воўк. Ён таксама абазначыў асаблівае месца ў гэтым працэсе МТЗ: "Гэта партнёр, які валодае тэхналогіямі, у тым ліку ў вытворчасці інструментаў, і сістэмай арганізацыі працы".
Свята на заводзе сабрала сотні гараджан.
Раман Треццякоў прыйшоў з усёй сям'ёй – жонкай і трыма дзецьмі. На прадпрыемстве ён працуе ўжо чатырнаццаты год наладчыкам аўтаматаў і паўаўтаматаў. З задавальненнем адзначае пераўтварэнні, якія адбываюцца на заводзе.
"Жыццё наладжваецца: адчуваецца, што вырашаюцца фінансавыя праблемы: апроч стабільнай зарплаты з'явіліся дадатковыя стымулюючыя выплаты. Цяпер, пасля аб'яднання з МТЗ, думаю, справы пойдуць яшчэ лепш. Людзі спадзяюцца на гэта, таму што бачаць зрухі", – канстатуе ён.
Аператар станкоў з праграмным кіраваннем Кірыл Басаргін прывёў з сабой сяброўку Аляксандру. "Хачу паказаць дзяўчыне, дзе працую, як змяніўся завод, што ў яго ёсць будучыня, мы ідзём наперад", – дзеліцца суразмоўнік. Працоўны стаж маладога чалавека пакуль невялікі – усяго паўтара года пасля каледжа, але перспектыву росту ён бачыць і складанасцей не баіцца, бо ёсць дасведчаныя настаўнікі і жаданне рухацца наперад. Плюс немалаважны фактар – зарплата. У сярэднім па заводзе яна складае Br606, а ў высокакваліфікаваных работнікаў можа дасягаць Br1,5 тыс. "Ёсць да чаго імкнуцца", – дадае Кірыл.
Цырымонія ўзнагароджання лепшых работнікаў, выстава тэхнікі МТЗ, займальнае знаёмства з вытворчасцю, кірмаш-распродаж, выступленні артыстаў не пакінулі нікога з прысутных абыякавымі.