Аршанскі раён павінен паказаць прыклад развіцця гарадам і раёнам краіны - Наталля Качанава

На пазачарговай сесіі Аршанскага райсавета Аляксандр Пазняк быў зацверджаны на пасадзе старшыні Аршанскага раённага выканаўчага камітэта. Да гэтага ён быў памочнікам Прэзідэнта – інспектарам па Віцебскай вобласці. Развітваючыся з журналістамі пасля сесіі, Наталля Качанава падкрэсліла, што задачы, пастаўленыя перад раёнам, застаюцца ранейшымі.

"Гэта эфектыўная праца кожнага прадпрыемства і эфектыўная праца раёна ў цэлым. Аршанскі раён павінен быць прыкладам у рэгіянальным развіцці для гарадоў і раёнаў краіны. Пастаўлена задача на прыкладзе Оршы паказаць, як можа развівацца горад і раён. Як эфектыўна могуць працаваць прадпрыемствы, арганізацыі, установы для таго, каб фарміраваць бюджэт, вырашаць сацыяльныя задачы", - сказала кіраўнік Адміністрацыі. Яна адзначыла, што кадры адыгрываюць ключавую ролю ў арганізацыі працы прадпрыемстваў і раёнаў. У гэтым кантэксце надзвычай важная роля кіраўніка.

"Калі кіраўнік на сваім месцы, ён разумее тыя задачы, якія стаяць перад ім, ён умее працаваць з людзьмі, усе праблемы вырашальныя. Бываючы ў рэгіёнах, я бачу, што ў адной і той жа эканамічнай сітуацыі прадпрыемствы працуюць па-рознаму. Там, дзе сапраўды добра працуе кіраўнік, ёсць поспех і ў прадпрыемства. І прыкладаў таму шмат у нашай краіне, і ў Оршы такіх дастаткова", - канстатавала Наталля Качанава.

Алена Ціханава - БЕЛТА.