Асноўныя вынікі палявых работ у Віцебскай вобласці. Інтэрв'ю з Аляксандрам Субоціным
— Аляксандр Міхайлавіч, як ацэньваеце прайшоўшую ўборачную кампанію?
— У бягучым годзе развіццё і выспяванне збожжавых і зернебабовых, як і іншых культур, праходзіла павольней, чым звычайна. На гэта паўплывалі розныя фактары, у тым ліку ўмовы надвор'я, якія склаліся з пачатку вегетацыйнага перыяду. У выніку сельгаспрадпрыемствы масава прыступілі да жніва толькі з 3 жніўня, тады як летась на гэту дату ўжо ўбралі 162,5 тыс. га, або амаль палову хлебаў. Прычым сёлета трэба было ўбраць 353 тыс. га збожжавых і зернебабовых, што больш чым на 40 тыс. га перавышае плошчы 2021-га.
У полі працавала 1159 зернеўборачных камбайнаў, іх гатоўнасць пастаянна падтрымлівалася на ўзроўні не ніжэй за 95%. Нагрузка на адзін камбайн склала парадку 367 га.
Вырашаліся пытанні забеспячэння механізатарскімі кадрамі, дызельным палівам. На належным узроўні падтрымлівалася гатоўнасць тэхнікі.
У раёнах, дзе тэхнікі было недастаткова, працавалі міжгаспадарчыя атрады. Гаспадаркі, якія завяршылі жніво, аказвалі тэхнічную дапамогу іншым сельгаспрадпрыемствам.
У выніку ў грамадскім сектары Віцебшчыны сабрана 1 млн 60 тыс. т збожжа пры сярэдняй ураджайнасці 30,3 ц/га. Для параўнання: у 2021 годзе было намалочана 782,2 тыс. т пры ўраджайнасці 25,3 ц/га.
Лічым, што аграрыі вобласці паспяхова справіліся з выкананнем задачы на хлебнай ніве. Уборачная кампанія праведзена ў магчыма сціслыя тэрміны на высокім арганізацыйным узроўні.
— Якія рэгіёны і гаспадаркі зрабілі найбольшы ўклад у агульны каравай?
— Лідарамі па намалоце збожжа сярод раёнаў сталі Аршанскі (валовы збор збожжа 128,7 тыс. т пры сярэдняй ураджайнасці 40,7 ц/га) і Віцебскі
(117 тыс. т, 41,7 ц/га) раёны.
Сярод гаспадарак лепшыя вынікі паказалі тры прадпрыемствы. ААТ «Віцебская бройлерная птушкафабрыка» забяспечыла збор больш за 54,5 тыс. т, прычым прадпрыемства абышло па гэтым паказчыку 15 (!) раёнаў. З кожнага гектара тут сабрана па 44,1 ц збожжа. Таксама ў ліку перадавікоў УП «Рудакова» (28,1 тыс. т,
37 ц/га) і ААТ «Агракамбінат «Юбілейны» (26,7 тыс. т, 50,7 ц/га).
Сярод сялянскіх (фермерскіх) гаспадарак хачу вылучыць СФГ «Тэра Грацыя» Сенненскага раёна. Валавы збор збожжа тут склаў 10,7 тыс. тон пры сярэдняй ураджайнасці 40,4 цэнтнера з гектара.
— Наколькі істотнай была дапамога гараджан?
— Як і ў папярэднія гады, сёлета на перыяд правядзення значных відаў сельскагаспадарчых работ (вясенняй пасяўной кампаніі, корманарыхтоўвання і ўборкі ўраджаю) мы вымушаны звяртацца да кіраўнікоў гарадоў і раёнаў па дапамогу ў прыцягненні дадатковых людскіх рэсурсаў. Якой бы высокапрадукцыйнай ні была сучасная тэхніка, без чалавека на зямлі не абысціся. З улікам скарачэння колькасці сельскага насельніцтва ў вёсках сельгасвытворцы па-ранейшаму адчуваюць недахоп працоўных рук.
На працягу года з гарадоў і райцэнтраў, у тым ліку ўстаноў профтэхадукацыі, на палявыя работы прыцягвалася больш за 5 тыс. чалавек, сярод якіх каля тысячы спецыялістаў па такой запатрабаванай рабочай прафесіі, як механізатар. Дарэчы, на перыяд уборкі прамысловыя арганізацыі вобласці дадаткова накіравалі 430 работнікаў, а таксама звыш 170 адзінак тэхнікі, уключаючы трактары, грузавыя аўтамабілі і пагрузчыкі.
Карыстаючыся выпадкам, хачу падзякаваць усім кіраўнікам гарадскіх прамысловых прадпрыемстваў, устаноў адукацыі, якія аказваюць дапамогу вяскоўцам часта нават на шкоду ўласнаму вытворчаму працэсу. Асаблівая падзяка тым спецыялістам, хто непасрэдна працуе ў полі.
Лідэрамі па намалоце збожжа сярод раёнаў сталі Аршанскі (валовы збор збожжа 128,7 тыс. т пры сярэдняй ураджайнасці 40,7 ц/га) і Віцебскі (117 тыс. т, 41,7 ц/га) раёны.
— Аляксандр Міхайлавіч, якая сітуацыя з выкананнем дзяржзаказу па збожжы і алеі рапсу?
— Па аператыўных даных на першую дэкаду верасня, сельгасарганізацыі Віцебшчыны ў кошт рэспубліканскіх дзяржаўных патрэб паставілі больш за 110 тыс. т збожжа, або 99,4% ад задання, якое складае 112,3 тыс. т (з улікам грэчкі і проса). Іншымі словамі, ёсць упэўненасць у тым, што дзяржзаказ па збожжы будзе цалкам выкананы, бо цяпер ідзе нарыхтоўка грэчкі і проса для харчовых мэт.
Акрамя таго, у цяперашні час прымаюцца меры па выкананні дзяржзаказу па алеі рапсу, якіх трэба паставіць 35 тыс. т.
— Падчас наведвання эксперыментальных палёў у Александрыі ў чэрвені гэтага года кіраўнік дзяржавы абазначыў неабходнасць змены севазвароту на Віцебшчыне. Як вырашаецца гэтая праблема?
— Зыходзячы з глебава-кліматычных умоў і назапашанага вопыту, па кожным раёне сфарміравана структура пасяўных плошчаў пад патрэбы ў прадукцыі раслінаводства. У яе аснове – задавальненне пагалоўя жывёлы ў летні пашавы перыяд у паўнавартасных кармах, збалансаваных па ўтрыманні энергіі і бялку, а таксама нарыхтоўка іх на зіму з улікам стварэння страхавога запасу. Акрамя таго, структура пасеваў улічвае патрэбы перапрацоўчых прадпрыемстваў у сельгассыравіне.
Пры гэтым стаўку робім на больш прадукцыйныя азімыя збожжавыя культуры. У агульным збожжавым кліне (350 тыс. га) пад іх адводзіцца 240 тыс. га, або 68%.
Пад уплывам кліматычных змен мяняюцца і ўмовы вядзення сельскай гаспадаркі. Мы ўжо спрабуем вырошчваць новыя для нас культуры — цукровы бурак, сою, сланечнік. Пашыраны плошчы пад крупянымі культурамі – просам і грэчкай.
Дарэчы, валавы збор збожжа дазваляе ў поўным аб'ёме забяспечыць грамадскае пагалоўе зернафуражом, патрэба ў якім складае 600 тыс. т. Цяпер свінагадоўчыя і комплексы па вырошчванні буйной рагатай жывёлы, а таксама птушкафабрыкі заключаюць дагаворы на закупку фуражнага збожжа ўраджаю 2022 года.
— Што неабходна рабіць, каб ураджай у 1 млн т і больш стаў будзённым для аграрыяў Віцебшчыны?
— Перш за ўсё, своечасова засяваць планавыя плошчы як азімых, так і яравых збожжавых і, адпаведна, якасна рыхтаваць для гэтага глебу. Унесці неабходны аб'ём угнаенняў, правесці абарону раслін ад пустазелля, хвароб і своечасова прыбраць, гэта значыць выконваць усе патрабаванні тэхналагічнага рэгламенту.
— Вашы пажаданні хлебаробам напярэдадні «Дажынак».
— У першую чаргу хочацца выказаць шчырыя словы падзякі ўсім працаўнікам вёскі і работнікам перапрацоўчай прамысловасці за карпатлівую працу, адданасць нялёгкай, але ганаровай справе. І ад усёй душы пажадаць моцнага здароўя, рэалізацыі планаў і новых творчых ідэй.
Няхай ваш штодзённы, плённы праца на карысць роднай зямлі прыносіць вам толькі задавальненне і радасць. Няхай у вашых дамах заўсёды будуць дабрабыт, дастатак і ўтульнасць!
З святам!
У 2022 годзе ў сярэднім на кожным гектары азімай пшаніцы атрымана 34,8 ц збожжа, азімага ячменю — 30,8 ц, што таксама з'яўляецца добрым вынікам.