Ад нафтаперапрацоўкі да транспарту: якія інвестпраекты будуць рэалізаваны ў Віцебскай вобласці ў 2020 годзе?
На гэтым завастрыў увагу кіраўніцкага актыву рэгіёна старшыня аблвыканкама Мікалай Шарснёў пры падвядзенні вынікаў 2019 года на нядаўняй сесіі абласнога Савета дэпутатаў. Праводзімая сацыяльная палітыка ў рэгіёне накіравана на забеспячэнне годнага ўзроўню жыцця грамадзян, умацаванне дэмаграфічнага статусу, павышэнне адукацыйнага і культурнага патэнцыялу насельніцтва, комплекснае развіццё тэрыторый і скарачэнне міжрэгіянальных адрозненняў якасці жыцця. Вырашэнне гэтых задач патрабуе прыцягнення інвестыцый ва ўсе сектары эканомікі, нагадаў Мікалай Шарснёў. У 2020 годзе агульная сума ўкладанняў складзе больш за 2,4 млрд рублёў. За кошт чаго прадугледжваецца забяспечыць такую інвестыцыйную актыўнасць?
У прамысловасці працягнецца рэалізацыя буйных праектаў у нафтаперапрацоўцы, завершыцца будаўніцтва 1-й чаргі Міёрскага металапракатнага завода. На Наваполацкім заводзе тэхналагічных металаканструкцый плануецца запусціць новы цэх зварнай рашоткавай падлогі. Рэзідэнт СЭЗ «Віцебск» з літоўскім капіталам кампанія «ВМГ ВудАрт» прыступіць да будаўніцтва лесапільнага завода і вытворчасці мэблі з аб'ёмам перапрацоўкі 500 тыс. куб. м драўніны ў год і накіруе на гэтыя мэты каля 57 млн долараў. Яшчэ адзін прадстаўнік СЭЗ – ТАА «Акітама» – плануе будаўніцтва трох заводаў у Віцебску, Полацку і Докшыцах па перапрацоўцы ў пелеты нізкасортнай драўніны гадавым аб'ёмам 280 тыс. куб. м і сумай інвестыцый 19 млн долараў. ІП «Віцебская лесапільня» рыхтуецца запусціць новы дрэваапрацоўчы комплекс.
Сярод інвестыцыйных праектаў у аграпрамысловым комплексе старшыня аблвыканкама выдзеліў будаўніцтва з прыцягненнем тэхналогій ізраільскай кампаніі «Агрыго» двух свінарэпрадуктараў на 5 тыс. галоў свінаматак прадпрыемствам «Віцебскі бекон» у Лёзненскім і Аршанскім раёнах. Плануецца завяршыць будаўніцтва інавацыйных малочна-таварных комплексаў «Купалінка», «Усце», «Хацілы-Агра», «Чурылава» і пачаць будаўніцтва пяці новых.
Важны праект намечана завяршыць у 2020 годзе ў Віцебску — гэта смеццесартавальны завод. Акрамя таго, у сістэме ЖКГ працягнецца будаўніцтва 80 станцый абезжалезвання за кошт крэдытных сродкаў ЕБРР, што дазволіць ужо ў будучай пяцігодцы палепшыць якасць водазабеспячэння 30 тыс. сельскіх жыхароў.
Для паляпшэння транспартнага абслугоўвання насельніцтва будуць набыты 26 аўтобусаў і 10 тралейбусаў з аўтаномным ходам. Працягнецца будаўніцтва пуцеправода «Полацкі» ў Віцебску і лагістычнага цэнтра «Брэміна-Орша».
У сацыяльнай сферы ў 2020 годзе інвестыцыйны патэнцыял трэба будзе сканцэнтраваць на такіх аб'ектах, як будаўніцтва школы на 1020 месцаў у раёне Білева-2 і новага корпуса дзіцячага рэабілітацыйна-аздараўленчага цэнтра «Жамчужына», рэканструкцыя хірургічнага корпуса абласнога клінічнага анкадыспансера і Віцебскай гарадской цэнтральнай клінічнай бальніцы, будынка гарадскога Палаца культуры «Орша» і шэрагу іншых праектаў. Запланавана добраўпарадкаванне гарадскіх пасёлкаў Відзы і Обаль, а таксама аб'ектаў абласнога цэнтра, які будзе рыхтавацца да правядзення Міжнароднага фестывалю мастацтваў «Славянскі базар» і абласнога фестывалю-кірмашу «Дажынкі-2020».
— Штогод мы прырастаем новымі аб’ектамі сацыяльнай сферы – адкрываем бальніцы, дзіцячыя сады, школы, спартзалы, басейны, стадыёны. Усё гэта кладзецца на бюджэт сур’ёзнай нагрузкай, якая з году ў год расце. Таму заклікаю ўсіх вельмі прадумана і адказна падыходзіць да планавання развіцця сацыяльнай сферы, — падкрэсліў Мікалай Шарснёў. — Да таго ж датацыйнасць бюджэту вобласці з году ў год памяншаецца, што сведчыць аб тым, што рэгіён зарабляе. Тым не менш на развіццё застаецца недастаткова сродкаў. Іх асноўнымі крыніцамі застаюцца зніжэнне затрат і эфектыўная праца. Сумаваўшы прыбытак і вызваленыя грошы ад аптымізацыі затрат, мы можам укладваць у развіццё не толькі сацыяльнай, але і вытворчай сфер.
Задачы стаяць складаныя, але вырашальныя. Тым больш што патэнцыял у Віцебшчыны велізарны. На гэта звярнула ўвагу старшыня Савета Рэспублікі Нацыянальнага сходу Рэспублікі Беларусь Наталля Качанава. Яна зрабіла акцэнт на пытаннях цэнаўтварэння, занятасці і заработнай платы.
— Віцебская вобласць недацягвае па выкананні паказчыка росту зарплаты, якая павінна ў цэлым быць на ўзроўні адной тысячы рублёў, — нагадала старшыня Савета Рэспублікі. Акрамя таго, неабходна вырашаць у індывідуальным парадку пытанні занятасці насельніцтва, для чаго выразна ставіць задачы перад кіраўнікамі прадпрыемстваў, арганізацый і ўстаноў па стварэнні працоўных месцаў з годнай аплатай працы.
Важнымі задачамі для рэгіёну застаюцца развіццё Аршанскага раёна, а таксама гарадоў з колькасцю насельніцтва больш за 80 тыс. чалавек — Оршы, Полацка і Наваполацка. Гэта пілотныя праекты, якія ў далейшым трэба будзе маштабаваць на ўсе гарады незалежна ад колькасці насельніцтва, нагадала спікер Савета Рэспублікі.
Яшчэ адно сур’ёзнае пытанне — праца па рэалізацыі даручэнняў кіраўніка дзяржавы па аграпрамысловым комплексе паўночнага рэгіёну.
— Кожны павінен разумець меру сваёй адказнасці — і мясцовыя органы ўлады, і кіраўнікі прадпрыемстваў. Тады ўсе задачы можна вырашыць. Тым больш што Прэзідэнт надае пільную ўвагу рэгіёну і падтрымлівае ўсе прапановы па яго развіцці, — падкрэсліла Наталля Качанава.