«Ад усёй душы»: Уладзімір Церанцьеў павіншаваў са святамі старэйшае пакаленне аграгарадка Бычыха

У рамках рэспубліканскай акцыі «Ад усёй душы» старшыня абласнога Савета дэпутатаў Уладзімір Церанцьеў, кіраўнік Гарадоцкага раёна Пётр Карабач, старшыня раённага Савета дэпутатаў Святлана Зуева, а таксама прадстаўнікі грамадскіх арганізацый і аб'яднанняў наведалі нядаўна адкрыты Бычыхінскі філіял тэрытарыяльнага цэнтра сацыяльнага абслугоўвання насельніцтва Гарадка і Гарадоцкага раёна.

Напярэдадні святкавання старога Новага года Уладзімір Уладзіміравіч выканаў дадзенае мясцовым жыхарам абяцанне і падарыў ім тэлевізар.

– Яшчэ месяц не прайшоў з моманту адкрыцця гэтага філіяла. Мне вельмі прыемна, што вы змаглі даказаць, як шмат можна зрабіць дзякуючы сваёй стараннай працы. У размове з грамадзянамі прагучала пажаданне аб тэлевізары. Пасля нарады мы ад імя абласной арганізацыі грамадскага аб'яднання «Белая Русь» вырашылі задаволіць гэту просьбу. Трэба заахвочваць людзей, даваць ім стымул на будучыню. Карыстайцеся з задавальненнем, – звярнуўся да прысутных Уладзімір Церанцьеў.

Да цёплых слоў і віншаванняў далучылася і кіраўніцтва раёна.

Пётр Пятровіч перадаў дырэктару ТЦСАН Святлане Ардзяка сертыфікат на мікрахвалевую печ.

Цяпер шчырыя гутаркі за кубкам духмянай гарбаты стануць яшчэ больш утульнымі і сагравальнымі для душы.