Памяць пра народны подзвіг у гады вайны неабходна пранесці праз стагоддзі - А.Косінец
5 ліпеня, Верхнядзвінскі раён /Сяргей Кочатаў - БЕЛТА/. Памяць аб народным подзвігу ў гады вайны неабходна захаваць і пранесці праз стагоддзі. Аб гэтым заявіў сёння старшыня Віцебскага аблвыканкама Аляксандр Косінец на ўрачыстым мітынгу, прысвечаным 50-й сустрэчы ветэранаў Беларусі, Расіі і Латвіі на Кургане Дружбы на мяжы трох краін, перадае карэспандэнт БЕЛТА.
Без еднасці народаў Савецкага Саюза не было б Перамогі, і памяць аб ёй неабходна як эстафету пранесці праз стагоддзі, падкрэсліў Аляксандр Косінец. Ён таксама зачытаў прывітальны адрас Прэзідэнта Беларусі Аляксандра Лукашэнкі ўдзельнікам сустрэчы.
Сёлета асноўныя мерапрыемствы прайшлі ў Себежскім раёне Пскоўскай вобласці. Як адзначыў на мітынгу губернатар Пскоўскай вобласці Андрэй Турчак, святочныя мерапрыемствы - гэта перш за ўсё нагода нагадаць сучаснаму пакаленню аб той цане, якой дасталася Вялікая Перамога. Удзельнікі мітынгу ўшанавалі хвілінай маўчання загінулых таварышаў. Святочныя гірлянды былі ўскладзены да воінскіх мемарыялаў на расійскай і беларускай тэрыторыях. Затым удзельнікі перадалі латвійскім ветэранам кошыкі кветак, каб яны ўсклалі да помнікаў загінулым латышскім партызанам.
Перад ветэранамі выступілі Ансамбль песні і танца Ленінградскай ваеннай акругі, творчыя калектывы Пскоўскай і Віцебскай абласцей. Завяршылася памятная сустрэча традыцыйным Кодам Дружбы. Усяго ў юбілейнай сустрэчы ветэранаў трох краін удзельнічала больш за 1 тыс. чалавек.
Напярэдадні, 4 ліпеня, у Себежскім раёне прайшоў міжнародны антыфашысцкі форум "Абаронім памяць аб Вялікай Перамозе!" з удзелам дэлегацый Беларусі, Латвіі, Эстоніі і Расіі. У ходзе маладзёжнай акцыі адбыліся мітынг, арганізаваны круглы стол, была разгорнута фотавыстава. Віцябляне правялі прэзентацыю кнігі аб гісторыі Кургана Дружбы "Братэрства. Мужнасць. Памяць", выдадзенай у вобласці да юбілейнай сустрэчы ветэранаў. Маляўнічае выданне атрымалі ўсе ўдзельнікі сустрэчы ветэранаў. Расійская дэлегацыя прадставіла відэафільм "Кургану Дружбы - 50!".
Курган Дружбы быў насыпан у 1959 годзе на мяжы трох рэспублік - Беларусі, Расіі і Латвіі - у гонар баявога садружнасці партызан і падпольшчыкаў. Зямля для кургана ўзята з магіл партызан і воінаў Чырвонай Арміі, якія аддалі жыццё за Радзіму, на яго вяршыні расце дуб як сімвал непарушнай дружбы трох народаў. У курган умантаваны тры гранітныя пліты, на якіх на трох мовах напісана: "Курган Дружбы ўзведзены на стыку межаў трох братніх рэспублік у гонар баявой дружбы, змацаванай крывёй у гады Вялікай Айчыннай вайны рускіх, беларускіх і латышскіх партызан. Адкрыты 3 ліпеня 1959 года". Ад кургана пракладзены тры алеі: у бок Беларусі алея засаджана бярозамі, Расіі - клёнамі, Латвіі - ліпамі. У канцы бярозавай алеі на тэрыторыі Верхнядзвінскага раёна (Віцебская вобласць) размешчаны мемарыяльны музей, экспазіцыя якога прысвечана партызанскаму руху.-0-