Патрыярх Кірыл азнаёміцца з духоўнай спадчынай Полацкай зямлі і ўчыніць літыю аб загінулых у гады вайны

27 верасня, Полацк /Дзіяна Курыла - БЕЛТА/. Патрыярх Маскоўскі і ўсяе Русі Кірыл сёння працягне свой першасвяціцельскі візіт у Полацкую епархію, а ў другой палове дня адправіцца ў Віцебскую епархію. Пра гэта карэспандэнту БЕЛТА паведамілі ў Беларускім экзархаце. Трэці дзень знаходжання прадстаяцеля Рускай праваслаўнай царквы ў Беларусі выпаў на свята Узвіжанне Крыжа Гасподняга, таму Свяцейшы Уладыка здзейсніць Боскую літургію ў Свята-Крыжаўзвіжанскім храме Полацкага Спаса-Еўфрасіннеўскага манастыра. Знаходзячыся ў Полацку, Яго Свяцейшае агледзіць Спас-Праабражэнскі храм і сабор Святой Сафіі - духоўна-культурную спадчыну найстаражытнейшага беларускага горада Полацка. Спас-Праабражэнская царква - выдатны твор старажытнага дойлідства, які ўвасабляе сабой вяршыню дасягненняў царкоўнай архітэктуры Полацкай зямлі. Увесь храм быў упрыгожаны фрэскавым роспісам; у ім каля хораў былі ўладкаваны дзве невялікія крыжападобныя ў плане келлі, у адной з якіх прападобная Еўфрасіння аддавалася малітве і багамысленню. Цяпер у царкве ідзе рэстаўрацыя захаванай роспісу. У пачатковы перыяд айчыннай гісторыі (ХІ-ХІІ стст.) Полацкі сабор Святой Сафіі як у царкоўным, так і ў грамадзянскім дачыненні надаваў гораду асаблівае значэнне: бо на Русі падобных храмаў было ўсяго тры. І ў гэтым сэнсе Полацк уваходзіў у лік самых важных ранніх дзяржаўных утварэнняў, якія склаліся ў тыя аддаленыя часы ў землях усходніх славян. Гэты храм згадваецца нават у "Слове аб палку Ігаравым". У Святой Сафіі служылі такія біскупы, як Праасвяшчэнны Дзіянісій і Праасвяшчэнны Сімяон, прылічаныя Царквой да ліку святых. У другой палове дня Патрыярх Маскоўскі і ўсяе Русі Кірыл прыбудзе ў Віцебскую епархію. Як чакаецца, ён наведае мемарыяльны крыж на месцы гібелі ў віцебскім канцлагеры 100 тыс. ахвяр нацызму, дзе ўскладзе кветкі. Затым з удзелам кіраўніка РПЦ адбудзецца малебен у Свята-Пакроўскім кафедральным саборы. Увечары Кірыл ускладзе вянок да манумента на плошчы Перамогі ў Віцебску і здзейсніць там ліцію аб загінулых у гады Вялікай Айчыннай вайны. Праграма візіту завершыцца 28 верасня сустрэчай Яго Свяцейшага з моладдзю ў Летнім амфітэатры Віцебска. Пасля гэтага Патрыярх адбудзе ў Маскву.-0-