Сітуацыя з паводкамі ў Верхнядзвінску да 1 мая павінна стабілізавацца

Паводкавая сітуацыя ў Верхнядзвінску да 1 мая павінна стабілізавацца, паведамілі карэспандэнту БЕЛТА ў "Віцебскаблгідрамеце".

Пачынаючы з 24 красавіка на Заходняй Дзвіне ў Верхнядзвінскім раёне адзначаецца ўстойлівае зніжэнне ўзроўню вады. Так, за мінулыя суткі ўзровень знізіўся на 45 см і цяпер складае 935 см, перавышаючы небяспечна дапушчальную адзнаку на 95 см. З улікам развіцця вясновых працэсаў чакаецца, што яна будзе перасечана ў зваротным напрамку ўжо на працягу найбліжэйшых дзён.

У цэлым вясновая паводка ў Віцебскай вобласці набліжаецца да завяршэння, падкрэслілі спецыялісты. На ўсіх рэках рэгіёну адзначаецца штосутачнае падзенне ўзроўню вады, якое з кожным днём паскараецца. Парушэнняў дадзенай тэндэнцыі гідролагі не прагназуюць.

Усяго па стане на вечар 28 красавіка ў Віцебскай вобласці заставаліся падтопленымі 24 жылыя дамы, 49 гаспадарчых пабудоў, сем участкаў дарог і мастоў, адселены 33 чалавекі, паведамілі ў Віцебскім абласным упраўленні МНС. Умовы жыццядзейнасці ў пацярпелых ад паводкі населеных пунктах не парушаны. Пры гэтым у перыяд з 27 па 28 красавіка былі зняты з уліку як падтопленыя 27 жылых дамоў, 64 гаспадарчыя пабудовы, два ўчасткі аўтадарог. Пастаянны маніторынг абстаноўкі ў вобласці працягваецца.