Першая ў вобласці школа міру з'явіцца ў Гарадоцкім раёне
Ён разлічаны на тры гады і ўключае пяць аспектаў: «Народная дыпламатыя», «Памяць», «Клопат і міласэрнасць», «Мір праз культуру», «Юны міратворац» (прадугледжвае стварэнне атрада юных паслоў міру, які будзе садзейнічаць вырашэнню задач праекта). Усе яны сугучныя з галоўнымі праграмамі і напрамкамі дзейнасці Фонду міру. Гэта сустрэчы з ветэранамі, навуковая і даследчая праца, клопат аб інвалідах, дзецях-сіротах, падтрымка валанцёрскага руху і іншае. Шмат што рэалізуецца ў раёне і сёння, але ў рамках праекта праца набудзе новую форму, дапаможа правесці свайго роду перазагрузку. Цяперашняе пакаленне патрабуе іншых падыходаў, трэба зрабіць так, каб дзеці ведалі аб мінулых трагедыях, адчулі і ўсвядомілі значнасць міру. Таксама плануецца рэканструяваць і мадэрнізаваць мясцовы народны музей баявой славы, які стане цэнтральным звяном для ўдзельнікаў праекта.
– Ініцыятыва стварэння школы міру належыць абласному аддзяленню Фонду міру і была цалкам падтрымана старшынёй райвыканкама Пятром Карабачом. У перспектыве школы міру з'явяцца і ў іншых рэгіёнах вобласці. Тое, што менавіта Гарадок стаў пляцоўкай для пілотнага праекта, шмат у чым не выпадкова. У бліжэйшы час пачынаем рыхтавацца да 75-годдзя вызвалення ад нямецка-фашысцкіх захопнікаў, а Гарадоцкі раён першым у вобласці сустрэне гэты юбілей, – сказаў старшыня абласнога Савета дэпутатаў Уладзімір Церанцьеў. – Вялікая ўвага будзе нададзена мемарыяльным комплексам. Тут хочацца выказаць асаблівую падзяку Фонду міру. Ён далучаецца да работ, якія мы вядзём у «Рыленках» Дубровенскага раёна. Акрамя таго, неўзабаве будзем святкаваць стагоддзе камісарыятаў, і тут арганізацыя не засталася абыякавай, за кошт сродкаў фонду плануем усталяваць мемарыяльную дошку камісару Крылову ў Віцебску. У цэлым у кожным рэгіёне ёсць мясцовы праект, які падтрымліваецца Фондам міру, што немалаважна, бо дабрачынныя ахвяраванні, якія збіраюцца на тэрыторыі тых ці іншых раёнаў, туды і вяртаюцца.
Варта адзначыць, што мінулы год для міратворцаў паўночнага рэгіёну прайшоў дастаткова прадуктыўна. Як паведаміла старшыня абласнога аддзялення БФМ Таццяна Тумановіч, больш за 60 мерапрыемстваў штоквартальна праводзілася ў рэгіёне пры фінансавым удзеле грамадскай арганізацыі. Па зборы дабрачынных сродкаў на рахунак Фонду міру Віцебшчына знаходзіцца ў тройцы лідараў. Найлепшы вынік у вобласці па выніках года паказала Расонская раённая арганізацыя. Якасна спрацавалі па ўсіх напрамках ва Ушачах, Дубровне, Глыбокім, Браславе, Мёрах, Полацку, Докшыцах, Шаркаўшчыне, Наваполацку, Оршы, Чашніках, Чыгуначным раёне Віцебска. Актыўна падтрымалі прыдзвінцы і рэспубліканскія акцыі. У прыватнасці, у рамках акцыі «Нашы дзеці» на ўмацаванне матэрыяльна-тэхнічнай базы сацыяльных устаноў накіравалі больш за 12 тыс. рублёў, што стала найлепшым паказчыкам па дадзеных рэспубліканскага Фонду міру.
У гэтым годзе найбольшую ўвагу будзе нададзена рэалізацыі праграмы «Памяць», перш за ўсё рэканструкцыі мемарыялаў у Дубровенскім і Расонскім раёнах, усталяванні помніка воіну-дэсантніку ў Віцебску, традыцыйнай акцыі «У страі заўсёды, у памяці навечна», а таксама стварэнню цэнтраў дзіцячай міратворчасці Фонду міру ва ўсіх кутках вобласці.