Першы кантэйнерны цягнік з беларускімі піламатэрыяламі даставіў лагістычны комплекс «Брэміна-Орша» у Кітай

Першы міжнародны кантэйнерны цягнік даставіў днямі ў Наньчан (Кітай) 41 кантэйнер з беларускімі піламатэрыяламі і тарфянымі ўгнаеннямі. Пра гэта vitvesti.by паведамілі ў ТАА «Брэміна Груп».

Усяго ў 2019 годзе запланавана сфарміраваць да 300 чыгуначных саставаў у Паднябесную і назад.

Першапраходзец, пераадолеўшы больш за 11 тыс. км па Беларусі, Расіі, Манголіі і Кітаю — тэрыторыям эканамічнага пояса Новага шаўковага шляху — адразу загрузіўся кітайскай прадукцыяй для адпраўкі ў Оршу, каб затым прайсці з таварам у краіны ЕС.

Устанаўленне рэгулярных зносін па маршруце Орша — Наньчан будзе спрыяць устойліваму развіццю шматфункцыянальнага прамыслова-лагістычнага комплексу «Брэміна-Орша» ў якасці дыстрыбуцыйнага хаба беларускай прадукцыі, якая пастаўляецца на знешнія рынкі, і росту экспарту лагістычных паслуг.

Аператарамі цягніка выступаюць беларуская кампанія і яе кітайскі лагістычны партнёр COSCO Shipping.

Фота з адкрытых крыніц, носіць ілюстрацыйны характар.