Першых родапачатніц напярэдадні 8 сакавіка прыняў абноўлены акушэрскі корпус Наваполацкай гарбальніцы

Першых родарод, напярэдадні 8 сакавіка, прыняў абноўлены акушэрскі корпус Наваполацкай цэнтральнай гарадской бальніцы, паведаміў карэспандэнту БЕЛТА намеснік старшыні Наваполацкага гарвыканкама Вячаслаў Дурноў.

Адкрыццё корпуса - гэта доўгачаканая падзея не толькі для наваполачанак, але і жыхарак Полацка і яшчэ дзевяці раёнаў Віцебскай вобласці. Раней у Полацку планавалася на працягу 2012-2015 гадоў пабудаваць новы радзільны дом. Па папярэдніх ацэнках, гэта абышлося б бюджэту ў Br120 млрд. Віцебскі аблвыканкам і ўлады Наваполацка і Полацка знайшлі больш эканамічны варыянт і прынялі рашэнне акумуляваць сродкі і накіраваць іх на рэканструкцыю пяціпавярховага будынка корпуса наваполацкай бальніцы, дзе раней размяшчаліся акушэрскае і гінекалагічнае аддзяленні з такім разлікам, каб удвая павялічыць колькасць ложкаў, распавёў Вячаслаў Дурноў. Пры гэтым на капітальныя работы пайшло менш за пяць месяцаў, а затраты скараціліся ў пяць разоў.

У абноўленым будынку, які смела можна назваць радзільным домам, ложкавы фонд павялічыўся да 120 месцаў. Яго тэхнічнае аснашчэнне адпавядае другому узроўню па аказанні акушэрскай і неанаталагічнай дапамогі. Працаваць тут будуць амаль 300 медработнікаў, у тым ліку каля паўсотні ўрачоў - акушэраў-гінеколагаў, неанаталагаў, рэаніматолагаў, анестэзіёлагаў. Для аказання медыцынскай дапамогі абсталяваны родавыя залы і аперацыйныя, блок інтэнсіўнай тэрапіі для немаўлят і рэанімацыйнае аддзяленне, палаты пасляродавага назірання. Дадаткова закуплены кувезы для нованароджаных, фетальныя маніторы, якія дазваляюць кантраляваць стан плёну, функцыянальныя ложкі і маніторы пастаяннага кантролю стану пацыентак, неанатальныя, пяленальныя і рэанімацыйныя столікі з падагрэвам, мэбля, мяккі інвентар.

Па папярэдніх дадзеных, у 2012 годзе ў Наваполацку ўпершыню за 16 гадоў узровень нараджальнасці перавысіў паказчык смяротнасці.