Піражкі "Гарэзы" і "бульбешнікі". У Міёрах пройдзе еўрапейскі кулінарны фестываль
У Міёрах 27 чэрвеня ўпершыню пройдзе кулінарны фестываль "Еўрапейскія прысмакі", паведамілі карэспандэнту БЕЛТА ў райвыканкаме.
Фестываль - частка праекта Еўрапейскага саюза "Паляпшэнне кулінарнага сэрвісу ў Латгальскім і Віцебскім рэгіёнах, заснаванае на канцэпцыі кулінарнай спадчыны" (Bella Cuisine). У гэтай праграме задзейнічаны тры краіны - Латвія, Літва і Беларусь.
Кулінарную разнастайнасць Міёрскага раёна на фестывалі прадставяць некалькі аграсядзіб і арганізацый. Яны пацешаць гасцей смачнага фестывалю бульбяной бабкай з салам, бешбармакам з бараніны, "бульбешнікамі", журавінавым напоем з мятай, піражкамі "Гарэзы", загадкавым гастранамічным вытанчаным стравай з бараніны пад назвай "Пячысты" і інш.
Арыгінальныя стравы, якія ўключаны ў Еўрапейскую сетку кулінарнай спадчыны, прадставяць і іншыя раёны вобласці, а таксама госці з Латвіі. Кухары абмяняюцца досведам на кулінарных майстар-класах.
На фестываль прыедуць таксама рамеснікі і артысты. Усяго ў Міёрах чакаюць каля 300 чалавек. Сярод іх ганаровыя госці - прадстаўнікі дыпламатычных місій.
"Міёры стануць першым горадам Беларусі, дзе пройдзе фестываль "Еўрапейскія прысмакі". А ў пачатку ліпеня смачнае свята сустрэнуць у Гомельскай вобласці", - распавялі ў райвыканкаме.
Еўрапейская сетка кулінарнай спадчыны папулярызуе мясцовыя кулінарныя асаблівасці, традыцыйныя стравы і рэцэпты. Яна ахоплівае больш за 1,2 тысячы сядзіб, рэстаранаў і кафэ ў Еўропе, дзе гасцям прапануюць паспрабаваць унікальныя стравы з мясцовых прадуктаў. У праекце прымаюць удзел рэгіёны Германіі, Даніі, Латвіі, Літвы, Нарвегіі, Польшчы, Украіны, Швецыі.
Беларусь прадстаўлена Віцебскай вобласцю. Яе ўступленне ў Еўрапейскую сетку кулінарнай спадчыны стала магчымым дзякуючы праекту Bella Cuisine. У ім удзельнічалі Міёрскі, Верхнядзвінскі, Глыбоцкі, Полацкі, Лепельскі і іншыя раёны.
Алена Ціханава,