Прадпрыемства Глыбоцкага доследнага лясгаса — адзінае ў краіне з поўным цыклам атрымання пасадачнага матэрыялу

Ужо больш за дваццаць гадоў ён па праве носіць ганаровае званне ўзорнага, забяспечваючы пасадачным матэрыялам усе лясгасы вобласці. За вопытам сюды прыязджаюць калегі з Вілейкі, Маладзечна, нацыянальных паркаў «Нарачанскі» і «Браслаўскія азёры».

– З надыходам сезона ў нас штодня загружаюцца сеянцамі і саджанцамі мінімум 3 – 4 лясгасы, – адзначыў начальнік гадавальніка Яўгеній Тарасенка. – Цяпер пад пагрузкай стаяць машыны з Лепеля і Богушэўска, іх адвязуць не адну тысячу штук сеянцаў.

Вясной усе яны трапяць у адкрыты грунт участкаў лесааднаўлення і зон азелянення, у тым ліку і ў Глыбоцкім раёне. У сярэднім тут штогод аднаўляюць лес на 140 гектарах леташніх высечак. Гэтая праца цяпер у самым разгары. Хутка і якасна выканаць яе калектыву дапамагаюць розныя арганізацыі раёна, якія актыўна ўключыліся ў рэспубліканскую акцыю «Аднавім лясы разам».

– Участкі для такіх работ рыхтуем загадзя. На іх здробнены галіны дрэў, што засталіся пасля лесанарыхтовак, нарэзаны плугам палосы. Ёсць лесапасадачная машына і спецыяльныя прыстасаванні для пасадкі. Але лепш за Мячу Калесава, вынайдзеную амаль 150 гадоў таму, ніхто нічога не прыдумаў, – падкрэсліў галоўны ляснічы лясгаса Віктар Міхневіч. – Гэтай лапатай віртуозна валодаюць нашы работнікі і многія з тых, хто пастаянна дапамагае нам у аднаўленні лесу.

Дарэчы, лясгас пачынае гэтую працу з нарыхтоўкі насення. Для гэтага мае плантацыю ў 100 га элітных дрэў, дзе збірае шышкі сосны і елкі. Іх сушаць, здабываюць насенне і высаджваюць.

Дарэчы, назіраць за працэсам высейвання насення ў касеты вельмі цікава. Як вада ў рацэ, па велізарным зале цячэ канвеер, механізмы якога запаўняюць касеты торфам, прамочваюць і абеззаражваюць яго, кладуць у кожную ячэйку семечка, засыпаюць спецыяльным матэрыялам, які захоўвае вільгаць. На выхадзе касеты збіраюць у вялікія стосы і адвозяць у цяпліцу. За змену з цэха туды перамяшчаюць прыблізна 3 тысячы штук, у якія пасаджана да 200 тысяч насення сосны або елкі.

У цяпліцы яны павінны прарасці, акрепнуць, пасля чаго іх высадзяць у грунт. За надвор'ем у цяпліцы сочыць уласная метэастанцыя, вызначаючы тэмпературу, вільготнасць паветра, згодна з якімі камп'ютары адрэгулююць аптымальны мікраклімат. Самы сапраўдны вытворчы працэс, дзе прадуктам выступае жывое дрэва.

"ВІЦЕБСКІЯ ВЕСТКІ"