Пяцёра жыхароў Віцебскай вобласці сталі героямі акцыі "Грамадзянская мужнасць" за дапамогу міліцыі

Традыцыі ў Дзень абаронцаў Айчыны праводзіць акцыю "Грамадзянская мужнасць" - ушаноўваць людзей з грамадзянскай пазіцыяй, памочнікаў у справе спынення злачынстваў і правапарушэнняў - ужо амаль 10 гадоў. "За гэты час узнагародамі ўпраўлення адзначаны больш за 20 жыхароў вобласці, якія прымаюць актыўны ўдзел у ахове грамадскага парадку, праяўляюць мужнасць і гераізм у няпростых сітуацыях, не застаюцца абыякавымі, калі бачаць парушэнне закона. Сёння мы чарговы раз праводзім такую акцыю - ушаноўваем пяцёх намінантаў. Таксама запрасілі ў якасці гледачоў кадэтаў, школьнікаў, каб на жывых прыкладах грамадзянскай мужнасці выхоўваць нашу моладзь", - адзначыў начальнік УУС аблвыканкама Віктар Сенько.

Работнікі ААТ "Даламіт" Дзмітрый Міронаў і Яўген Чудакоў атрымалі дыпломы УУС у намінацыі "За смеласць і рашучасць". Красавіцкім вечарам маладыя людзі сталі сведкамі злачынства ў гарадскім пасёлку Руба: мужчына вырваў на вуліцы сумку ў жанчыны. Пачуўшы крыкі аб дапамозе, хлопцы не разгубіліся і пасля даволі працяглай пагоні затрымалі рабаўніка і перадалі яго супрацоўнікам міліцыі, якія прыбылі па выкліку. Ім аказаўся дасведчаны злачынец, у чорным паслужным спісе якога налічваецца некалькі судзімасцяў.

Пенсіянер Леанід Дадэркін затрымаў серыйнага злодзея ў садаводчым таварыстве "Тыраспаль", старшынёй якога з'яўляецца ўжо амаль чвэрць стагоддзя. Вечарам пільны мужчына заўважыў незнаёмца, якому не было чаго рабіць у таварыстве, прасачыў за ім, пакуль не ўбачыў, як той забраўся праз акно ў адзін з дамоў. Выйсці адтуль з награбленым мясцовы вартавы злодзею не даў. Як бы злачынец ні лаяўся, але прымяняць сілу ў дачыненні да рашуча настроенага пенсіянера не рызыкнуў. Цяпер Леанід Дадэркін узнагароджаны ў намінацыі "За неабыякавасць", што сімвалічна, бо гэту якасць ён праяўляе далёка не першы раз - на яго рахунку гэта ўжо сёмы затрыманы зламыснік.

Сярод узнагароджаных былі і прадстаўніцы прыгожага полу - Аляксандра Сінкевіч і Наталля Ціханава. Гэтыя работніцы аўтазаправачнай станцыі на выездзе з Віцебска адзначаны ў намінацыі "За смекалку і знаходлівасць". Менавіта такія якасці яны праявілі, калі, позна ўвечары застаўшыся ўдваіх на змене, звярнулі ўвагу на пару нецвярозых маладых людзей. Тыя доўга круціліся ля халадзільніка з півам, дзе паводзілі сябе вельмі распусна. Калі ж грошай разлічыцца не хапіла, пачалі лаяцца і паводзіць сябе агрэсіўна. Але аператары АЗС не разгубіліся: запісалі нумар машыны пакупнікоў і патэлефанавалі ў дзяжурную частку ДАІ, націснулі на трывожную кнопку аховы. А каб зацягнуць час да прыезду праваахоўнікаў, адключылі камп'ютары і іншымі хітрыкамі спрабавалі затрымаць парушальнікаў. Супрацоўнікі ДАІ перахапілі хуліганаў на выездзе з аўтазаправачнай станцыі. Прычым не абышлося без пераследу, бо, як аказалася, адзін з мужчын сеў за руль п'яным і без правоў. Віктар Сенько падкрэсліў, што узнагароджаныя падчас акцыі - толькі малая частка неабыякавых людзей, гатовых прыйсці на дапамогу незнаёмаму, спыніць злачынства або правапарушэнне.

"Нам не трэба, каб кожны здзяйсняў подзвігі. Галоўнае, каб людзі хаця б паведамлялі аб здзейсненым правапарушэнні або злачынстве. І такое, на шчасце, адбываецца часта. Зрэшты, нямала грамадзяне і самі актыўна ўдзельнічаюць у паімцы злачынцы, утрымліваюць яго да прыбыцця міліцыі. Прычым выпадкаў, каб пры гэтым нехта перавысіў межы неабходнай самаабароны або прычыніў сур'ёзную шкоду правапарушальніку, у нас не было. Усё гэта кажа аб тым, што наша грамадства здаровае і працягвае паступальна развівацца", - дадаў начальнік УУС.

Кацярына Князева. Фота Аляксандра Хітрова.БЕЛТА.