Па колькасці медалёў міжнародных спаборніцтваў Віцебшчына заняла другое месца ў краіне
Віцебшчына па праву можа ганарыцца традыцыямі фізкультурна-спартыўнага руху, поспехамі нашых землякоў на сусветных арэнах. Дынамічна развіваецца матэрыяльна-тэхнічная база галіны як у абласным цэнтры, так і ў раёнах. Гэта дазваляе не толькі вырошчваць будучых алімпійцаў, але і праводзіць прэстыжныя спаборніцтвы, у тым ліку міжнародныя.
У вобласці ў спецыялізаваных вучэбна-спартыўных установах за кошт бюджэтных сродкаў культывуецца 43 віды спорту. У спортшколах займаецца каля 21,7 тыс. чалавек пад кіраўніцтвам 1070 трэнераў-выкладчыкаў.
– Спартсмены Віцебшчыны ў мінулым годзе на афіцыйных міжнародных спаборніцтвах заваявалі 136 узнагарод, у тым ліку 59 залатых. Гэта другі вынік у краіне пасля сталіцы, — сказаў начальнік упраўлення спорту і турызму аблвыканкама Васіль Захарэвіч. — У 2018-м прадстаўнікі вобласці 33 разы падымаліся на п'едэстал. Найбольшы ўклад у дасягненні на сусветным узроўні ўносяць батутысты, цяжкаатлеты, лёгкаатлеты, вадналыжнікі, барцы і спартсмены-паралімпійцы.
Вынікі плённай працы трэнерска-выкладчыцкага саставу і паказаныя высокія дасягненні адзначаны на дзяржаўным узроўні. За значны асабісты ўклад у развіццё спорту вышэйшых дасягненняў ганаровае званне «Заслужаны трэнер Рэспублікі Беларусь» прысвоена Васілю Шулікіну і Віктару Стрэмякову, «Заслужаны майстар спорту Рэспублікі Беларусь» — Ірыне Крыўко.
Спецыяльнай прэміі Прэзідэнта Рэспублікі Беларусь «Беларускі спартыўны Алімп» удастоены Вольга Уласава, Віялета Скварцова.
Лаўрэатамі прэміі «Чалавек года Віцебшчыны» сталі Даніэл Мукеце і Ірына Крыўко. Стыпендыятамі Прэзідэнцкага спартыўнага клуба сталі 22 спартсмены і два маладыя перспектыўныя трэнеры.
На зімовых Алімпійскіх гульнях у паўднёвакарэйскім Пхёнчхане першы ў гісторыі вобласці залаты медаль у жаночай эстафеце па біятлоне ў складзе каманды прынесла наша зямлячка Ірына Крыўко, сёмыя месца ў мас-старце па канькабежным спорце ў Віталя Міхайлава.
У арганізаваныя формы заняткаў фізічнай культурай і спортам на Віцебшчыне ўцягнута 270 тыс. чалавек, або 22,9% ад агульнай колькасці жыхароў. Штогод нарасціць колькасць праводзімых фізкультурна-аздараўленчых і спартыўна-масавых мерапрыемстваў і колькасць іх удзельнікаў.
Развіццю спартыўна-масавай працы ў вобласці спрыяе пастаяннае паляпшэнне матэрыяльна-тэхнічнай базы. Толькі ў мінулым годзе ўведзены ў эксплуатацыю фізкультурна-аздараўленчы комплекс з басейнам «Юнацтва» ва Ушачах, плавальны басейн у Гарадку, стадыён Віцебскага дзяржаўнага тэхналагічнага ўніверсітэта, лёгкаатлетычнае ядро на стадыёне спартыўнага комплексу ФК «Віцебск», шматпрофільныя спортпляцоўкі з сучасным штучным пакрыццём у Дубровне і Сянне.
Пачата ўзвядзенне спецыялізаванай залы для скачкоў на батуце ў Віцебску. Таксама неўзабаве з'явяцца новы ФАК у Верхнядзвінску і культурна-аздараўленчы комплекс у Лёзне (абодва з басейнамі).
— Велізарныя намаганні прыкладаюцца для таго, каб павысіць эфектыўнасць дзейнасці аб'ектаў фізкультурна-спартыўнага прызначэння. Іх напаўняльнасць з улікам прапускной здольнасці — 85,9%, — паведаміў Васіль Аляксеевіч. — За 2017-ы даходы ад пазабюджэтнай дзейнасці склалі каля 6,7 млн руб.
Па даручэнні старшыні аблвыканкама Мікалая Шарстнёва, каб прыцягнуць насельніцтва да заняткаў фізкультурай і забяспечыць крокавую даступнасць неабходнага інвентара, у вобласці ўсталёўваюцца трэнажоры на дваровых тэрыторыях.
Яны з'явіліся не толькі ў Віцебску, але і ў многіх раёнах. Ёсць магчымасць актыўна адпачываць і аматарам зімовых відаў спорту. Так, у мінулым сезоне функцыянавалі 75 пунктаў пракату лыж, санак і канькоў.
Традыцыйна праводзяцца унутрыгаліновыя і міжгаліновыя круглагадовыя спартакіяды прафсаюзаў, спартыўныя святы. Да прыкладу, адноўлены абласныя спаборніцтвы «Сельскія гульні», якія праводзяцца штогод. Адкрыты спортзбудаванні і на базе буйных прадпрыемстваў і арганізацый. Так, у 2017-м пасля капітальнага рамонту аднавілі працу спорткомплексы ААТ «ВЗРД «Маналіт» і РУП «Віцебскэнерга», у бліжэйшыя дні для аматараў здаровага ладу жыцця расчыніць дзверы спорткомплекс СТАА «Марка».
У рамках Дзяржаўнай праграмы «Прадухіленне інваліднасці і рэабілітацыя інвалідаў» для людзей з абмежаванымі магчымасцямі створаны 44 групы здароўя. У 2017-м для дадзенай катэгорыі грамадзян праведзена 225 розных стартаў.
У склад нацыянальнай зборнай Беларусі па інваспорце ўваходзяць 56 спартсменаў Віцебшчыны. Яны неаднаразова заваёўвалі ўзнагароды на міжнароднай арэне. Так, на XXII Паралімпійскіх гульнях у Пхёнчхане Святлана Саханенка выйграла тры залатыя і адну бронзавую медалі, Лідзія Графеева — дзве бронзы.