Па пытанні забруджвання возера Гародна ў раёне в. Гародняны
Віцебскай абласной лабараторыяй аналітычнага кантролю ДУ ”Рэспубліканскі цэнтр аналітычнага кантролю ў галіне аховы навакольнага асяроддзя“ 22.10.2012 г., 29.10.2012 г. праведзены адборы проб паверхневых вод з меліярацыйных каналаў, ручая і возера Гародна.
Згодна з пратаколам выпрабаванняў сцёкавых, паверхневых вод ад 29.10.2012 г. №462-СПВ перавышэнняў дапушчальных канцэнтрацый (далей-ПДК) у возеры Гародна не ўстаноўлена.
Разам з тым, пры аналізе вынікаў выпрабаванняў паверхневых вод у меліярацыйных каналах і ў ручаі, які ўпадае ў возера Гародна, устаноўлена перавышэнне ПДК у раёне размяшчэння ААТ ”Віцебскі плодаагароднінны камбінат“ і комплексу КРС ”Ноўка“ ААТ ”Рудакова“.
Згодна з пратаколам выпрабаванняў сцёкавых, паверхневых вод ад 29.10.2012 г. №460-СПВ па ААТ ”Віцебскі плодаагароднінны камбінат“ устаноўлена перавышэнне ПДК у меліярацыйным канале па БПК5 у 8,1 раза, па жалезе (агульнае) у 11,8 раза, па ХПК у 2,5 раза. На выпуску прамліўневых вод у меліярацыйны канал з тэрыторыі ААТ ”Віцебскі плодаагароднінны камбінат“ устаноўлена перавышэнне ПДК у меліярацыйным канале па БПК5 у 15,6 раза, па завіслых рэчывах у 4,7 раза, па жалезе (агульнае) у 3 разы, па ХПК у 5,8 раза, па фосфары агульным у 1,2 раза.
Згодна з пратаколам выпрабаванняў сцёкавых, паверхневых вод ад 29.10.2012 г. № 461-СПВ па комплексе КРС ”Ноўка“ ААТ ”Рудакова“ устаноўлена перавышэнне ПДК у меліярацыйным канале па БПК5 у 15,3 раза, па амоній-іоне ў 1,9 раза.
Згодна з пратаколам выпрабаванняў сцёкавых, паверхневых вод ад 29.10.2012 г. № 462-СПВ устаноўлена перавышэнне ПДК у месцы ўпадзення ручая ў возера Гародна па БПК5 у 3,1 раза.
Пры выяўленні прычын, якія выклікалі забруджванне водных аб'ектаў, праведзена абследаванне каналізацыйных сетак ААТ ”Віцебскі плодаагароднінны камбінат“, дзе ўстаноўлена парушэнне правілаў эксплуатацыі каналізацыйнай помпавай станцыі, у выніку чаго скідаліся сцёкавыя воды ў меліярацыйны канал.
Таксама ўстаноўлены факт трапляння ў меліярацыйны канал гноеўтрымліваючых сцёкаў і расолу ад сіласных траншэй з тэрыторыі комплексу КРС ”Ноўка“ ААТ ”Рудакова“.
Віцебскай раённай інспекцыяй прыродных рэсурсаў і аховы навакольнага асяроддзя ААТ ”Рудакова“ і ААТ ”Віцебскі плодаагароднінны камбінат“ выдадзены загады аб недапушчэнні трапляння забрудненых сцёкаў у водныя аб'екты і ліквідацыі выяўленых крыніц забруджвання.
За парушэнні правілаў эксплуатацыі водагаспадарчых збудаванняў на ААТ ”Віцебскі плодаагароднінны камбінат“ складзены адміністрацыйны пратакол па арт.15.53. ч.1 Кодэкса Рэспублікі Беларусь аб адміністрацыйных правапарушэннях. За забруджванне водных аб'ектаў адміністрацыйныя матэрыялы па арт.15.51. ч.1 Кодэкса Рэспублікі Беларусь аб адміністрацыйных правапарушэннях у дачыненні да ААТ ”Рудакова“ і ААТ ”Віцебскі плодаагароднінны камбінат“ накіраваны ў суд Віцебскага раёна для прыняцця рашэння. Па фактах прычынення шкоды навакольнаму асяроддзю ААТ ”Рудакова“ і ААТ ”Віцебскі плодаагароднінны камбінат“ праводзіцца разлік для прад'яўлення прэтэнзіі аб пакрыцці шкоды, прычыненай навакольнаму асяроддзю.
ААТ ”Віцебскі плодаагароднінны камбінат“ праведзены работы па ачыстцы пясколовак і каналізацыйных калодцаў, праводзяцца рамонтныя работы на каналізацыйнай помпавай станцыі.
На комплексе КРС ”Ноўка“ ААТ ”Рудакова“ праведзены работы па вывазе арганікі з пляцоўкі захоўвання гною, праведзена ачыстка ад сцёкаў фільтравальных і аглядавых калодцаў, выраблена абваловка меліярацыйных каналаў для прадухілення трапляння сцёкаў у водныя аб'екты. Праводзіцца вываз сцёкаў з чэкаў-накапляльнікаў.
Соб.інфо