Пераможная шайба Андрэя Касціцына прынесла яшчэ Br25 млн. наваполацкай хакейнай школе

9 мая, Мінск /Кар. БЕЛТА/. Спецыялізаваная дзіцяча-юнацкая школа алімпійскага рэзерву хакейнага клуба "Хімік" з Наваполацка атрымае яшчэ Br25 млн. ад Прэзідэнцкага спартыўнага клуба за пераможны гол форварда зборнай Беларусі Андрэя Касціцына ў матчы з камандай Славеніі ў заключны дзень турніру за захаванне прапіскі ў элітным дывізіёне чэмпіянату свету, які праходзіць у славацкіх Браціславе і Кошыцах, паведамляе карэспандэнт БЕЛТА. Выйгрыш у славенцаў з лікам 7:1 дазволіў беларускай дружыне застацца ў эліце сусветнага хакея. Андрэй Касціцын у гэтым матчы закінуў дзве шайбы, і першая з іх, праведзеная на 8-й хвіліне сустрэчы, стала пераможнай. У рамках праекта, які стартаваў у 2010 годзе на папярэднім чэмпіянаце свету ў Германіі, Прэзідэнцкі спартыўны клуб прадастаўляе кожнаму гульцу нацыянальнай каманды Беларусі, які закінуў пераможную шайбу, а таксама брамніку, які згуляў "на нуль", права вызначыць дзіцяча-юнацкую хакейную школу, якой будзе аказана бязвыплатная дапамога ў памеры Br25 млн. на ўмацаванне яе матэрыяльна-тэхнічнай базы і арганізацыю спартыўных мерапрыемстваў. Як паведамілі БЕЛТА ў прэс-службе Прэзідэнцкага спартыўнага клуба, форвард зборнай Беларусі і "Манрэаль Канадыенс" Андрэй Касціцын, для якога гэта ўжо другі пераможны гол на цяперашнім чэмпіянаце свету, і на гэты раз вырашыў падтрымаць хакейную школу са свайго роднага горада. Такім чынам, бязвыплатная адрасная дапамога для спецыялізаванай дзіцяча-юнацкай школы алімпійскага рэзерву хакейнага клуба "Хімік" складзе ў суме Br50 млн. Першую на цяперашнім чэмпіянаце свету пераможную шайбу Андрэй Касціцын закінуў 6 мая ва ўстрэчы з камандай Аўстрыі (7:2) у стартавым паядынку турніру за выжыванне. На ЧС-2011 у Славакіі зборная Беларусі атрымала ўсяго дзве перамогі. Прайграўшы Канаде (1:4), Швейцарыі (1:4) і Францыі (1:2 у авертайме) на папярэдняй стадыі турніру, беларусы занялі апошняе месца ў сваёй групе. У турніры за захаванне элітнай прапіскі Беларусь абыграла Аўстрыю (7:2), саступіла Латвіі (3:6) і перамагла Славенію (7:1), здолеўшы ўтрымацца ў класе наймацнейшых і заняўшы 14-е выніковае месца сярод 16 каманд. У 2010 годзе на чэмпіянаце свету ў Германіі галкіпер Андрэй Мезін таксама скарыстаўся правам выбару ў адрас наваполацкай СДЮШАР хакейнага клуба "Хімік". Акрамя таго, сумы ў памеры Br25 млн. былі накіраваны ў гродзенскую СДЮШАР №10 (па рашэнні аўтара пераможнага гола Міхаіла Сцефановіча) і двойчы - у СДЮШАР хакейнага клуба "Юнацтва-Мінск" (выбар Аляксея Калюжнага). У наступным годзе чэмпіянат свету па хакеі пройдзе ў Фінляндыі і Швецыі. Прэзідэнцкі спартыўны клуб працягне акцыю падтрымкі хакейных школ Беларусі і спадзяецца, што гульцы нацыянальнай каманды змогуць здабыць больш перамог, чым на цяперашнім сусветным форуме ў Славакіі.-0-