Ганара консульства Славацкай Рэспублікі адкрылася ў Віцебску

Дзейнасць ганаровага консульства будзе накіравана на наладжванне больш цесных кантактаў паміж суб'ектамі гаспадарання, дзеячамі культуры, ВНУ і іншымі патэнцыйнымі партнёрамі.

"Нягледзячы на тое, што ў Беларусі дастаткова эфектыўна працуе пасольства Славакіі, кіраўніцтва гэтай краіны ўбачыла ў паўночна-ўсходнім рэгіёне Беларусі - а ў кампетэнцыю ганаровага консульства ўваходзяць Віцебская і Магілёўская вобласці - цікавыя магчымасці для развіцця супрацоўніцтва ў сферы эканомікі, культуры, адукацыі і г.д.", - падкрэсліў ганаровы консул Аляксей Сычоў.

Дзейнасць ганаровага консульства будзе накіравана на наладжванне больш цесных кантактаў паміж суб'ектамі гаспадарання, дзеячамі культуры, ВНУ і іншымі патэнцыйнымі партнёрамі, - перадае карэспандэнт БЕЛТА. У прыватнасці, ёсць намер напярэдадні або непасрэдна падчас фестывалю "Славянскі базар у Віцебску" правесці бізнес-форум, на якім прадугледжваецца падпісанне дамоўленасцей аб супрацоўніцтве паміж універсітэтамі паўночнага рэгіёну Беларусі і Славакіі, а таксама дагавора аб пабрацімскіх адносінах паміж Віцебскам і адным з адпаведных яму па патэнцыяле славацкіх гарадоў (разглядаюцца два варыянты - Кошыцы і Прэшаў).

Першым крокам Аляксея Сычова на пасадзе ганаровага консула для ўмацавання культурных сувязяў паміж Віцебскай вобласцю і Славакіяй стала выстава "Прывітанне Беларусі", якая адкрылася ў гэты ж дзень у бібліятэцы Віцебскага дзяржаўнага медыцынскага ўніверсітэта. Гэты фота-музычны праект чатырох краін Вышаградскага рэгіёну прысвечаны 10-годдзю ўступлення Славакіі, Чэхіі, Польшчы і Венгрыі ў Еўрапейскі саюз.

На ўрачыстым мерапрыемстве з нагоды адкрыцця ганаровага консульства прысутнічалі намеснік старшыні Віцебскага аблвыканкама Алег Мацкевіч, пасол Славакіі ў Беларусі Міраслаў Мойжыта, генеральны дырэктар упраўлення гандлю Міністэрства замежных і еўрапейскіх спраў Славакіі Дагмар Рэпчакова, а таксама пасол Венгрыі ў Беларусі Вілмош Сіклавары, пасол Чэхіі ў Беларусі Мілан Экерт.