Амаль 1,4 тыс. сем'яў Віцебскай вобласці скарысталіся сямейным капіталам датэрмінова
Сярод тых, хто вырашыў кватэрнае пытанне з дапамогай «матчынага» капіталу, – віцебская сям'я Берашэвічаў. Сужэнцы Ірына і Аляксандр выхоўваюць дзвюх дачок і сына. Менавіта пасля нараджэння Іллюшы, чатыры гады таму, дзяржава налічыла суму, эквівалентную тады 10 тысячам долараў. Скарыстацца гэтымі сродкамі бацькі аддалі перавагу, не чакаючы паўналецця хлопчыка.
Берашэвічы жывуць у трохпакаёвай кватэры, за яе да гэтага часу выплачваюць крэдыт, які бралі як маладая сям'я яшчэ з адным дзіцем. Частка сямейнага капіталу, а менавіта, каля 16 тыс. рублёў, былі накіраваны на долевыя ўнёскі за новабудоўлю. Астатнюю частку дэпазітнага рахунку вырашылі пакуль не чапаць, тым больш праз некалькі гадоў трэба будзе задумацца аб паступленні старэйшай Марыі ў ВНУ. Самі сужэнцы маюць інжынерную адукацыю (муж працуе ў праектнай арганізацыі, жонка – у ВДТУ), таму і дзяцей хочуць бачыць дыпламаванымі спецыялістамі.
Падымаць на ногі адразу траіх дзяцей няпроста, але ў той жа час менавіта ў статусе «шматдзетная сям'я» Берашэвічы адчулі важкую падтрымку з боку дзяржавы. Адной з першых прэферэнцый – дапамога ў пагашэнні крэдыту на кватэру, штомесячныя выплаты скараціліся ў некалькі разоў. Затым старэйшая дачка пачала атрымліваць у школе бясплатнае харчаванне, а плата за падручнікі знізілася ўдвая. У новым навучальным годзе ў першы клас пойдзе сярэдняя Ганна, нагрузка на сямейны бюджэт павялічыцца. Сама Ірына як шматдзетная маці карыстаецца правам на скарочаны працоўны тыдзень. У дадатковы выхадны стараецца ўладзіць усе «дзіцячыя» справы, каб не адпрошвацца з працы. Ды і магчымасць больш часу надаць кожнаму дзіцяці – для клапатлівай мамы важная прывілея.
Як патлумачыла намеснік старшыні камітэта па працы, занятасці і сацыяльнай абароне аблвыканкама Ніна Калымага, на сённяшні дзень памер сямейнага капіталу складае 22,5 тыс. рублёў, з наступнага года сума будзе штогод індэксавацца з улікам росту спажывецкіх цэн. Права на яго прызначэнне гэтага віду дзяржпадтрымкі сям'я набывае з нараджэннем (усынаўленнем) трэцяга і (або) наступнага дзіцяці пры ўмове, што на дату адкрыцця дэпазітнага рахунку бацькі выхоўваюць не менш за траіх (уключаючы нованароджанага) дзяцей ва ўзросце да 18 гадоў.
Дадаткова можна выкарыстоўваць сямейны капітал, налічаны як з 1 студзеня 2020 года, так і ў перыяд 2015 – 2019 гг. Сродкі могуць быць накіраваны на будаўніцтва (рэканструкцыю) або куплю жылля, пагашэнне запазычанасці па жыллёвых крэдытах і выплату працэнтаў па іх, на атрыманне на платнай аснове вышэйшай і сярэдняй спецыяльнай адукацыі ў дзяржустановах, аплату шэрагу медыцынскіх паслуг, у тым ліку ў анкалогіі, кардыя- і нейрахірургіі, стаматалогіі. Дадатковае выкарыстанне магчыма ў поўным аб'ёме або часткамі ў безнаяўным парадку. Для гэтага атрымальнікам неабходна звярнуцца ў адміністрацыю раёна або горада па месцы прызначэння сямейнага капіталу альбо па месцы рэгістрацыі.
"Віцебскія весці", фота Дзмітрыя ОСІПАВА.