Кухар з Віцебску, які замахнуўся на забойства дзядулі, асуджаны на 14 гадоў турмы
За замах на забойства, злучанае з рабаваннем, кухар з Віцебска асуджаны да 14 гадоў пазбаўлення волі з канфіскацыяй маёмасці. Пра гэта карэспандэнту БЕЛТА паведаміла пракурор аддзела па наглядзе за законнасцю судовых пастаноў па крымінальных справах пракуратуры Віцебскай вобласці Ганна Тылец.
У законную сілу ўвайшоў прыгавор у дачыненні да 21-гадовага кухара, які ў жніўні 2014 года спрабаваў забіць і абрабаваць сваяка свайго дзеда. Да здзяйснення злачынства малады чалавек падрыхтаваўся загадзя - прыпас (вынес з працы) нож, падрыхтаваў пальчаткі і шапку з прарэзамі для вачэй. Усё гэта ён склаў у сумку і ў адзін з вечароў папрасіў сябра адвезці яго ў вёску пад Віцебскам, дзе жыў яго родны дзед. Прыбыўшы ў населены пункт, малады чалавек накіраваўся да аднаго са сваякоў свайго дзеда, пералез праз плот і выклікаў ахвяру на вуліцу. Нічога не падазравалы пажылы мужчына (1940 года нараджэння) выйшаў на ганак, пагаварыў з незваным госцем, а калі пайшоў яго праводзіць, атрымаў удар у спіну нажом.
"Забіць чалавека гэтым ударам злачынца не змог, дзядуля аказаўся моцным і з дваццацісантыметровым лязом у спіне стаў абараняцца - схапіў палено і прымусіў нападніка ўцячы. Затым пацярпелы дайшоў да суседзяў, якія выклікалі хуткую дапамогу і выконвалі ўсе ўказанні медыкаў па аказанні дапамогі параненаму, які ў выніку выжыў", - распавяла пракурор.
У ходзе следства падазроны растлумачыў, што здзейсніў злачынства з карыслівых меркаванняў, бо з размоў мясцовых жыхароў ведаў, што пацярпелы збірае грошы. Малады чалавек разлічваў выкрасці не менш за $1,5 тыс.
Абласны суд асудзіў маладога чалавека да 14 гадоў пазбаўлення волі з канфіскацыяй маёмасці і адбываннем ва ўмовах узмоцненага рэжыму. Вярхоўны суд, дзе разглядалася касацыя, пакінуў прыгавор без змянення.
Алена Ціханава