Паўнамоцтвы Аршанскага і Полацкага гарадскіх Саветаў дэпутатаў перададзены раённым Саветам
У адпаведнасці з указам №27 ад 14 студзеня 2013 года "Аб аб'яднанні раёнаў і гарадоў абласнога падпарадкавання Рэспублікі Беларусь, якія маюць агульны адміністрацыйны цэнтр" адбылася рэарганізацыя гарадскіх і раённых Саветаў дэпутатаў з аб'яднаннем іх у адну структуру. Аршанскі і Полацкі гарадскія Саветы дэпутатаў ліквідаваны, а іх паўнамоцтвы перададзены раённым Саветам дэпутатаў. Дэпутаты гарадскіх акруг працягнуць працу на тых жа правах у раённых Саветах.
У Аршанскім раённым Савеце дэпутатаў у цяперашні час працуюць 64 дэпутаты, 29 з якіх абіраліся па гарадскіх акругах. Яго ўзначаліў старшыня Аршанскага раённага Савета дэпутатаў Станіслаў Кошкін. У гутарцы з карэспандэнтам БЕЛТА ён падкрэсліў, што асноўнай задачай дэпутацкага корпуса з'яўляецца праца з насельніцтвам - вырашэнне надзённых праблем жыхароў раёна і горада.
Нанова абраны старшыня Полацкага раённага Савета дэпутатаў Іосіф Грыбовіч паведаміў, што ў склад Савета ўвайшоў 61 дэпутат, 31 з іх былі дэпутатамі гарсавета. Па яго словах, аб'яднаны дэпутацкі корпус накіруе свае намаганні на аператыўнае, мэтанакіраванае вырашэнне пытанняў жыццезабеспячэння насельніцтва, будзе ў комплексе вырашаць пытанні сацыяльна-эканамічнага развіцця рэгіёна.
Указам №27 прадугледжваецца аб'яднанне Аршанскага раёна і Оршы, Полацкага раёна і Полацка з мэтай удасканалення сістэмы дзяржаўнага кіравання, забеспячэння комплекснага развіцця адміністрацыйна-тэрытарыяльных адзінак базавага тэрытарыяльнага ўзроўню.