Паланез, полька, падэпацінер. У Віцебску навагодні баль закружыў найлепшых студэнтаў і навучэнцаў вобласці
На баль запрошаны выдатнікі вучобы, прызёры алімпіяд і міжнародных канферэнцый, валанцёры, актывісты БРСМ і ўдзельнікі студэнцкіх атрадаў, пераможцы конкурсаў і спаборніцтваў, лепшыя студэнты ВНУ і навучэнцы Віцебскага і Полацкага кадэцкіх вучылішчаў, Віцебскіх дзяржаўных каледжа культуры і мастацтваў і музычнага каледжа імя І.І. Салярцінскага.
Пасля ўрачыстага шэсця элегантных пар пад «Паланэз» з оперы «Яўгеній Анегін» П.І. Чайкоўскага адкрыў навагодні баль старшыня Віцебскага аблвыканкама Аляксандр Субоцін:
– Дарагія дзеці, сябры! Гледзячы на вас, такіх прыгожых, вытанчаных дзяўчат і сапраўдных мужчын, хочацца сказаць: дамы і спадары. Тут сабраны лепшыя, самыя актыўныя і перспектыўныя, пераможцы алімпіяд, спаборніцтваў, конкурсаў. Усё, што вы робіце, праслаўляе не толькі вас, але і вашу навучальную ўстанову, горад, вобласць, краіну. Няхай збудзецца тое, што вам хочацца і што вам сапраўды трэба. І куды б ні закінула вас лёс, заўсёды памятайце свае карані: бацькоў, настаўнікаў, тое месца, адкуль вы родам, памятайце сваю Радзіму. З Новым годам! Шчасця вам, мірнага неба і больш пазітыву ў жыцці!
Аляксандр Міхайлавіч узнагародзіў лепшых з лепшых юнакоў і дзяўчат, якія сваімі дасягненнямі пішуць гісторыю нашай краіны.
Прывітаў удзельнікаў балю і памочнік Прэзідэнта Рэспублікі Беларусь – інспектар па Віцебскай вобласці Анатоль Ліневіч:
– Напярэдадні Новага года падводзяцца вынікі мінулага. «Студэнт года» з Віцебска, у апошнія гады «Каралева студэнцтва» з Віцебска. Хацелася б, каб лепшыя ў краіне заўсёды былі з Віцебшчыны. Жадаю, каб, выязджаючы ў іншыя краіны, вы ўсюды з гонарам казалі, што вы беларусы, таму што жывяце ў цудоўнай краіне. З наступаючым Новым годам, шчасця, поспехаў, моцнага здароўя і ўсяго самага найлепшага!
Сярод запрошаных быў і пераможца Рэспубліканскага конкурсу «Студэнт года – 2022» трэцякурснік Віцебскага дзяржаўнага тэхналагічнага ўніверсітэта Яраслаў Іваноў:
– Гэты год быў самы яркі за ўсё маё жыццё. Пачаўся з таго, што з камандай ВДТУ мы паехалі ў Стаўрапаль на конкурс «Каралева Саюзнай дзяржавы» і вярнуліся з перамогай. Потым мне прапанавалі працаваць у рэжысёрска-пастановачнай групе фестывалю «Славянскі базар у Віцебску», затым – у дырэкцыі Міжнароднага конкурсу сучаснай харэаграфіі IFMC. І цяпер – перамога ў Рэспубліканскім конкурсе «Студэнт года». Гэтую перамогу я, напэўна, да канца яшчэ не ўсвядоміў, пакуль я больш рады за свайго кіраўніка Чыслову Алесю Анатольеўну, у яе ў скарбонцы цяпер 1, 2 і 3 месцы.
На факультэце інфармацыйных тэхналогій і робататэхнікі ВДТУ Яраслаў асвойвае спецыяльнасць «тэхналогія машынабудавання». Пасля атрымання дыплома інжынера малады чалавек плануе набыць яшчэ спецыяльнасць эканаміста ў магістратуры альма-матар.
Адна з узнагароджаных сёння губернатарам – Соф'я Свяжынская, якая ў Віцебскім дзяржаўным каледжы імя І.І. Салерцінскага навучаецца ігры на домры. У колькіх рэспубліканскіх і міжнародных конкурсах выканаўцаў на народных інструментах дзяўчына стала пераможцай толькі сёлета, не пералічыць.
– Да апошняга не верылася, што я буду прадстаўляць каледж на навагоднім балу. Гэта вельмі вялікі гонар і вельмі прыемна, – прызналася Сафія. – Мы доўга рыхтаваліся да гэтага мерапрыемства, нас навучалі ўсім танцам. Усе стараліся зрабіць усё якасна, каб стварыць сапраўдную атмасферу свята, у Год гістарычнай памяці вярнуць нас у той час, калі балы былі звычайнай справай. Ну а для нас сёння гэта як свецкая вечарынка.
Атмасферу свецкага свята стваралі на навагоднім балу сімфанічны аркестр пад кіраўніцтвам Уладзіміра Беляўскага і іншыя артысты Віцебскай абласной філармоніі.
Пад прыгожую музыку моладзь танцавала польку, кружыла ў вальсе, слізгала ў падэпацінеры, вывучала свецкі этыкет на прыкладзе мовы веера. А калі ў госці зайшлі Дзед Мароз і Снягурка, бал працягнуўся гульнямі, пажаданнямі і падарункамі ад казачнага госця. На памяць аб навагоднім балу ў кожнага застануцца не толькі цёплыя ўспаміны, але і агульнае фота з элегантнымі дамамі і вытанчанымі кавалерамі.
