Полацкія камунальнікі задумаліся пра альтэрнатыву традыцыі вешаць "замочкі кахання" на мосце

15 верасня, Віцебск /Дзіяна Курыло - БЕЛТА/. Полацкія камунальнікі сур'ёзна задумаліся аб альтэрнатыве традыцыі вешаць "замочкі кахання" на Чырвоным мосце, распавёў карэспандэнту БЕЛТА дырэктар камунальнага ўнітарнага прадпрыемства "Жыллёва-камунальная гаспадарка г.Полацка" Уладзімір Шэдько. Італьянская рамантычная мода дакацілася да Полацка некалькі гадоў таму. Як і жыхары Пірэнеяў, закаханыя палачане ў якасці залогу вечнага кахання сталі чапляць замкі на парэнчы моста і выкідваць ключ у раку, выбраўшы для гэтага Чырвоны мост праз Палату. За час існавання традыцыі на мосце з'яўляліся сотні замкаў, перыядычна камунальныя службы іх зразалі. Як растлумачыў Уладзімір Шэдько, "каб не парушалі эстэтыкі". Аднак супрацьстаяць закаханым не змаглі нават камунальныя службы - замочкі зноў і зноў з'яўляліся на парэнчах. Па словах Уладзіміра Шэдько, цяпер камунальныя службы выношваюць ідэю стварэння альбо "дрэва кахання" як у Маскве, альбо, як у Фларэнцыі, прыгожага ліхтарнага слупа, куды закаханыя маглі б вешаць свае замочкі, не парушаючы гарадской эстэтыкі. "Традыцыя "замочкаў кахання" - выдатная, і мы не супраць яе", - падкрэсліў суразмоўца. А тым часам у Рыме, дзе муніцыпальныя ўлады спрабавалі змагацца з "замочкамі кахання" і няшчадна іх зразалі, разгарэліся нясцерпныя запалы: закаханыя ўсімі спосабамі адстойвалі сваё права павесіць замок на парэнчы моста Мільвіо праз Тыбр і адстаялі. Ды і ў Адэсе, дзе маладыя вешалі замочкі на парэнчы Цешчынага моста, паднялася вялікая шуміха пасля таго, як камунальнікі вызвалілі мост ад замкаў. У Маскве маладыя спачатку таксама вешалі замкі на Лужковым мосце. Аднак, зрэзаўшы замкі з парэнчаў, улады ўсталявалі чыгуннае дрэва, на якім замкі глядзеліся таксама добра, як і на мосце. Традыцыя прыжылася, і следам за першым дрэвам з'явіліся наступныя - так шмат жадаючых было павесіць свой замочак на галінах незвычайнага дрэва. А вось у Віцебску, дзе "замочкамі кахання" абвешаны мост імя Пушкіна, камунальныя службы не маюць намеру перашкаджаць рамантыкам. Па словах спецыялістаў прадпрыемства "Гардармост", нягледзячы на тое, што мост з'яўляецца стратэгічным аб'ектам і ніякіх незапраектаваных аб'ектаў і прадметаў на ім быць не павінна, яны не збіраюцца зразаць "замочкі кахання". Хоць прапанаваць альтэрнатыву мосту было б нядрэнна, лічаць інжынеры "Гардармост". -0-