Полацкі каледж Віцебскага дзяржаўнага ўніверсітэта імя П. Машэрава адзначыў сваё 150-годдзе
Сёння каледж – гэта сучасная мабільная навучальная ўстанова са складзенымі традыцыямі, магутным адукацыйным патэнцыялам. Тут навучаецца больш за 600 навучэнцаў па пяці спецыяльнасцях: «дашкольная адукацыя», «пачатковая адукацыя», «замежная мова», «музычная адукацыя», «арганізацыя гасцінічных паслуг». З 88 выкладчыкаў больш за палову – яго лепшыя выпускнікі.
Гісторыя навучальнай установы пачалася 6 кастрычніка (па старым стылі) 1872 года. У гэты дзень была ўрачыста адкрыта Полацкая настаўніцкая семінарыя. Яна павінна была забяспечыць пачатковыя школы рэгіёна кадрамі. У першы навучальны год у семінарыю былі залічаны 52 юнакі, большасць з іх – сяляне і мяшчане Віцебскай губерні.
– У нас сапраўды высокапрафесійны калектыў. 78% педагагічных работнікаў маюць вышэйшую кваліфікацыйную катэгорыю, 55% – акадэмічную ступень магістра, аднаму педагогу прысвоена званне кандыдата філалагічных навук, шэсць выкладчыкаў узнагароджаны нагрудным знакам «Выдатнік адукацыі», – кажа член Савета Рэспублікі Нацыянальнага сходу Беларусі, заслужаны работнік адукацыі, дырэктар Полацкага каледжа ВДУ ім. П. Машэрава Таццяна Палушкіна (на фота). – Кіраваць такім калектывам вельмі адказна і ганарова.
У працоўнай кніжцы Таццяны Палушкінай толькі два запісы: полацкая школа №7 і педагагічны каледж, у якім пройдзены шлях ад выкладчыка філалагічных дысцыплін да дырэктара. Можна ўявіць, колькі душэўных і фізічных сіл таленавіты педагог і кіраўнік аддала калектыву за больш чым чатыры дзесяцігоддзі.
– Цяпер узрастае значэнне адукацыйнага і гуманітарнага супрацоўніцтва, канструктыўнага ўзаемадзеяння з іншымі ўстановамі адукацыі. У сувязі з гэтым вялікую ўвагу мы надаём пашырэнню сувязяў з навучальнымі ўстановамі Федэрацыі, – кажа Таццяна Палушкіна. – У нас заключаны пагадненні аб супрацоўніцтве з пяццю расійскімі педагагічнымі каледжамі: Кемераўскім, Смаленскім, №18 з Міціна Масквы, №№4 і 8 з Санкт-Пецярбурга.
За апошнія тры гады Полацкі каледж станавіўся пераможцам абласнога агляду-конкурсу на лепшую арганізацыю ідэалагічнай работы ў працоўных калектывах Віцебскай вобласці ў намінацыі «Вышэйшая, сярэдняя спецыяльная і прафесійна-тэхнічная адукацыя». У 2022-м установа адукацыі занесена на Дошку гонару горада Полацка і Полацкага раёна.
Калектыў удзельнічае ў эксперыментальным інавацыйным праекце па тэме «Распрацоўка і апрабацыя электроннага адукацыйнага рэсурсу для інтэграцыі ў адзіны адукацыйны рэсурс для ўстаноў ПТВ і ССА», што дазваляе ўкараняць у адукацыйны працэс самы перадавы вопыт.
На працягу больш за 20 гадоў каледж на 100% выконвае кантрольныя лічбы прыёму па ўсіх спецыяльнасцях, таксама паспяхова праходзіць размеркаванне навучэнцаў па розных рэгіёнах нашай рэспублікі. Гэта з'яўляецца доказам запатрабаванасці спецыялістаў з сярэдняй спецыяльнай педагагічнай адукацыяй.
У Год гістарычнай памяці тут рэалізуюцца грамадзянска-патрыятычныя праекты, накіраваныя на вывучэнне і захаванне памяці аб выпускніках і педагогах навучальнай установы: «Каб жыццё працягвалася зноў», «І ажываюць у памяці нятленнай героі вогненных саракавых». Подзвігі выпускнікоў каледжа Таццяны Марыненка, Ліліі Касцецкай, Мікалая Жыжова, Анастасіі Бельскай у гады Вялікай Айчыннай вайны служаць прыкладам для маладога пакалення. Сённяшні навучэнец ужо ўсведамляе, што, прыйшоўшы заўтра ў школу ці дзіцячы сад, ён стане не толькі педагогам, але і першым ідэолагам для дзіцяці. Выхаваць годнага патрыёта сваёй краіны, высокаадукаваную асобу – задача кожнага выпускніка педагагічнага профілю.
Сістэма адукацыі пастаянна ўдасканальваецца, укараняюцца новыя інтэрактыўныя метады навучання, электронныя вучэбныя дапаможнікі і формы праверкі ведаў. Але адно застаецца нязменным – гэта найвялікшая роля Настаўніка. Толькі ён, спалучаючы ў сабе мудрасць, педагагічны талент, абуджае ў сэрцах вучняў самыя светлыя пачуцці, вучыць думаць і разумець, адрозніваць дабро ад зла, верыць у сябе.