Полацкі камбінат хлебапрадуктаў рыхтуе да запуску ўласны цэх па вытворчасці круп
ААТ "Полацкі камбінат хлебапрадуктаў" рыхтуе да запуску ўласны цэх па вытворчасці круп, паведаміла начальнік аддзела рэалізацыі і маркетынгу Полацкага камбіната хлебапрадуктаў Алена Дубніцкая.
"У гэтым годзе мы набылі невялікі па аб'ёме крупах, дзе будзе перапрацоўвацца ячная, перлавая, аўсяная, пшанічная і грэцкая крупы. Гэта даўняя задумка дырэктара. Падрыхтавалі памяшканне, закупілі абсталяванне, нядаўна прыязджалі наладчыкі з Расіі і Украіны, навучылі людзей. На ўсё было затрачана каля Br1 млрд уласных сродкаў прадпрыемства. У далейшым набудзем плюшчылку, каб вырабляць аўсяныя шматкі. Да гэтага часу камбінат купляў крупы і толькі фаставаў іх для рэалізацыі", - растлумачыла Алена Дубніцкая.
У цяперашні час вядзецца тэхналагічная дапрацоўка, рыхтуюцца неабходныя дакументы. Прадугледжваецца, што новы цэх будзе вырабляць прыкладна 4-5 т крупы ў змену (за 8 гадзін). Пры неабходнасці ён можа працаваць і ў 3 змены. "З кастрычніка-лістапада бягучага года разлічваем пачаць продажы гатовай прадукцыі ў гандлёвай сетцы не толькі вобласці, але і ўсёй рэспублікі", - дадала суразмоўніца.
Сыравіна для перапрацоўкі будзе выкарыстоўвацца мясцовая, яна нарыхтоўваецца ў некалькіх раёнах Віцебскай вобласці (за выключэннем проса, якое ў рэгіёне не вырастае).
Полацкі камбінат вядзе планамерную працу па пашырэнні вытворчай базы і асартыменту прадукцыі, пошуку новых рынкаў збыту. "Не так даўно ў нас была праведзена рэканструкцыя млына, зараз вядзем рэканструкцыю камбіната, усталёўваем новае абсталяванне. Паўтара года таму адкрылі мясную перапрацоўку: пачалі выпрацоўваць каўбасы, каціць вэнджаніну хатнім спосабам. Нядаўна пабудавана лінія прэміксаў з паэлементным уводам, для чаго закуплена сучаснае абсталяванне. З гэтымі вітамінна-мінеральнымі дабаўкамі плануем у найбліжэйшай будучыні выходзіць на экспарт", - адзначыла начальнік аддзела рэалізацыі і маркетынгу.