Памочнік Прэзідэнта – інспектар па Віцебскай вобласці Анатоль Ліневіч правёў прамую тэлефонную лінію і прыём грамадзян у Талачынскім райвыканкаме
Так, жыхар вёскі Рамашкава Талачынскага раёна расказаў, што дом, у якім ён на дадзены момант пражывае, значыцца на балансе УП «Талачынскі Элеватар-Агра». Дакументы аб прыватызацыі, па словах мужчыны, калісьці згарэлі падчас пажару ў канторы гаспадаркі.
– Я дакладна рабіў адлічэнні на капітальны рамонт, сам стараўся падтрымліваць дом у парадку, – паскардзіўся пенсіянер. – Аднак цяпер ні фінансавых, ні фізічных магчымасцей для гэтага не маю. А аконныя праёмы развальваюцца на вачах. Звяртаўся да кіраўніцтва Талачынскага Элеватар-Агра. Адказалі: вы павінны гэта рабіць самі. Таксама мужчына ўзняў пытанне магчымасці прыватызацыі жылля па астаткавым кошце. Анатоль Ліневіч сказаў пра тое, што ў першую чаргу трэба аднаўляць дакументацыю – заключаць тыпавыя дагаворы. А далей у гэтым канкрэтным выпадку прадметна вызначыцца з кіраўніцтвам прадпрыемства. Пытанне ўзята ім пад асабісты кантроль.
Наступнае пытанне, з якім звярнулася да памочніка Прэзідэнта – інспектара па Віцебскай вобласці маладая спецыялістка аднаго з сельгаспрадпрыемстваў раёна, можна аднесці да разраду нетыповых. Дзяўчына паскардзілася на кіраўніка гаспадаркі, што яе прымушаюць працаваць звышурочна, пазбаўляюць дадатковых выплат. Як высветлілася падчас разбору па гэтым пытанні, па ўмовах працоўнага дагавора ў маладога агранома – ненорміраваны працоўны дзень. А даплаты прадугледжаны за складанасць і напружанасць. Чаго, па словах кіраўніка сельгаспрадпрыемства, ад гэтага работніка чакаць не даводзіцца. На пытанне Анатоля Ліневіча «Вы прыйшлі ў гаспадарку працаваць ці адпрацоўваць?» дзяўчына, нічым не збянтэжыўшыся, адказала: «адпрацоўваць». У гэтай сітуацыі, як гаворыцца, без каментарыяў…
А вось яшчэ адна так званая скарга. Са словамі «дабрацца да патрэбных інстанцый» і абвінавачваннямі на адрас улады патэлефанавала жыхарка Санкт-Пецярбурга, ураджэнка Талачынскага раёна. Апошні раз жанчына была ў бацькоўскім доме ў 2011 годзе. А цяпер, прыехаўшы на малую радзіму, абураная тым, што за ім ніхто не назіраў, ён прыйшоў у заняпад. Таксама абуралася з нагоды таго, што на бліжэйшых вясковых могілках замест бетоннай агароджы ўсталявалі драўляную. Старшыня адпаведнага сельвыканкама растлумачыў, што тэрыторыя вакол дома неаднаразова абкошвалася сіламі сельсавета. Не менш займальны і той факт, што скардзіца не прадаставіла ніякіх дакументаў, якія пацвярджаюць факт рэгістрацыі дома і зямельнага ўчастка. Як высветлілася з запыту ў БТІ – такіх не маецца зусім. Іншымі словамі, у спадчыну жанчына не ўступала. Як растлумачыў старшыня сельвыканкама, дом уключылі ў спісы пустуючых, адправілі адпаведнае пісьмо дадзенай жыхарцы Санкт-Пецярбурга. І цяпер – зноў канфлікт і абвінавачванні на адрас мясцовай улады. Нават, па словах кіраўніка сельсавета, з пагрозамі.
– Гэта недапушчальна, – адзначыў Анатоль Ліневіч. – Такія факты трэба спыняць на корані, падключыўшы супрацоўнікаў РАУС.
У гутарцы з журналістамі памочнік Прэзідэнта – інспектар па Віцебскай вобласці сказаў пра тое, што кожны выпадак, з якім звяртаюцца людзі ў розных рэгіёнах, індывідуальны. Адпаведным павінен быць падыход у вырашэнні пытання – дасканалы. Каб максімальна дапамагчы чалавеку разабрацца ў праблеме.
– У асноўнай масе пытанні датычацца ЖКГ і дарог, – канстатаваў Анатоль Ліневіч. – Безумоўна, гэта важная састаўляючая жыцця людзей. Тое, што часам адразу звяртаюцца да кіраўнікоў больш высокага звяна, гэта не недавер да мясцовай улады. Проста часта людзі думаюць, што чым вышэй узровень пасады чыноўніка, тым хутчэй вырашыцца пытанне. На самой жа справе ўсё роўна ўсе праблемы вырашаюцца сумеснымі намаганнямі – даюцца тлумачэнні, выконваюцца даручэнні, пытанні трымаюцца на кантролі. Некаторыя моманты ўдаецца праясніць адразу, у некаторых сітуацыях патрабуюцца выезды на месцы, дбайны аналіз. У любым выпадку ні адно зварот не застаецца без адказу.
Анатоль Ліневіч таксама наведаў Элеватар-Агра, Талачынскі лясгас, пагутарыў з калектывамі прадпрыемстваў.
