Апошні званок у школах Віцебскай вобласці прагучыць 29 мая для 23 тыс. выпускнікоў

28 мая, Віцебск /Вольга Багачова - БЕЛТА/. У школах Віцебскай вобласці апошні званок у гэтым навучальным годзе прагучыць 29 мая, паведаміў карэспандэнту БЕЛТА начальнік упраўлення адукацыі Віцебскага аблвыканкама Іван Шчурок. У апошні раз яго пачуюць 10470 выпускнікоў, якія завяршаюць навучанне ў сярэдняй школе, і 12,5 тыс. дзяцей, якія атрымліваюць пасведчанне аб базавай адукацыі. А ўжо 11-12 ліпеня былыя школьнікі адсвяткуюць заканчэнне школы на выпускных балах, якія пройдуць у гэтыя дні ва ўсіх установах адукацыі Віцебскай вобласці. "Было прынята рашэнне адмовіцца ад правядзення гэтых мерапрыемстваў на базе рэстаранаў і іншых аб'ектаў харчавання, бо ў іх магчымы продаж спіртнога. Між тым ужыванне алкаголю на выпускным вечары недапушчальна як для школьнікаў, так і для педагогаў, якія адзначаюць гэтае свята разам з імі", - падкрэсліў Іван Шчурок. Разам з тым поўная адмова ад алкаголю не азначае адсутнасць свята. Сумеснымі намаганнямі вучняў і настаўнікаў выпускныя балы пройдуць шумна, весела і ярка. Яны стануць падзеяй, якая запамінаецца, у жыцці дзяцей, упэўнены начальнік упраўлення адукацыі. Увосень месцы былых выпускнікоў зойме зусім юнае папаўненне: у школы вобласці прыйдуць каля 12 тыс. першакласнікаў. Пры гэтым найбольш актыўна да іх прыходу рыхтуецца вялікая школа ў мікрараёне Білева абласнога цэнтра, якая ўпершыню расчыніць свае дзверы. У першы клас тут ужо набрана 10 паралеляў, а ў другі - сем. Выхаваннем і навучаннем дзяцей будуць займацца больш за 100 педагогаў.-0-