Амбасадар Японіі ў Беларусі Хірокі Токунага наведаў Віцебск
— Вы ўжо не першы раз наведваеце Віцебшчыну. У апошнія гады ў нас было шмат кропак судотыку, сказаў, сустракаючы госця, старшыня абласнога Савета дэпутатаў Уладзімір Церанцьеў. — У першую чаргу хачу падзякаваць вас за перадачу ў лістападзе мінулага года спецыяльнага аўтамабіля для перавозкі інвалідаў-калясачнікаў і пажылых людзей Тэрытарыяльнаму цэнтру сацыяльнага абслугоўвання насельніцтва Віцебскага раёна. Таксама прыемна, што дзеячы японскай культуры, адукацыі і сацыяльнай сферы ўдзельнічаюць у нашых мерапрыемствах. У прыватнасці, выступалі на Міжнародным фестывалі мастацтваў «Славянскі базар у Віцебску» і фестывалі сучаснай харэаграфіі IFMC. Шмат супольных праектаў у грамадскіх арганізацый, напрыклад, з фондам міру і саюзам жанчын. Японскія валанцёры падзяліліся з віцяблянамі вопытам клоўнатэрапіі ва ўстановах аховы здароўя. Пладатворна ідзе ўзаемадзеянне ў спартыўнай сферы. Да нас прыязджалі вашы дзюдаісты і майстры спочана, біятланісты-юніёры і юныя батутысты. Спадзяюся, гэта стане лакаматывам для стварэння ўзаемавыгадных праектаў у эканамічным і турыстычным напрамках.
Хірокі Токунага ўпэўнены, што трэба азнаёміць прадстаўнікоў японскага бізнесу з патэнцыялам Віцебскай вобласці.
— У Японіі ў апошні час узрос аб'ём імпартуемай з Беларусі сухой сыроваткі. На Віцебшчыне створаны цэлы комплекс прадпрыемстваў, якія перапрацоўваюць малако, і яны маюць вялікі патэнцыял на нашым рынку. Мне вядомая прадукцыя ААТ «Малако» г. Віцебск, кандытарскай фабрыкі «Віцьба», Аршанскага льнокамбіната. Некалькі японскіх бізнесменаў ужо прыязджалі да вас, каб бліжэй вывучыць вытворчасць, але гэтага відавочна недастаткова, — паведаміў пасол. — Ваша вобласць цікавая нам з пункту гледжання экалагічнага турызму. Таксама японцы вельмі любяць Марка Шагала, таму Віцебск, малая радзіма вялікага мастака, можа прыцягнуць маіх суайчыннікаў. Мы нацэлены на доўгатэрміновае супрацоўніцтва, гатовы аказваць вам дапамогу ў розных галінах. Так, праграма грантавай дапамогі ўрада Японіі працягвае дзейнічаць, таму ў вас ёсць магчымасць падаваць новыя заяўкі.
На сустрэчы прысутнічаў член-карэспандэнт НАН Беларусі, член прэзідыума Савета Рэспублікі Нацыянальнага сходу Рэспублікі Беларусь Сяргей Рахманаў. Ён падкрэсліў, што зараз ідзе станаўленне беларуска-японскай асацыяцыі бізнесу, якая будзе садзейнічаць рэалізацыі ўзаемавыгадных праектаў, у тым ліку ў IT-сферы. Акрамя таго, Сяргей Кімавіч параіў уладам вобласці прызначыць адказнага за працу з японскім бокам, каб супольная дзейнасць стала больш сістэмнай і эфектыўнай.
Кіраўнік дыпламатычнай місіі прыехаў на Віцебшчыну разам з алімпійскім чэмпіёнам 2008 года па дзюдо Ісіі Сатосі, які правёў майстар-класы для мясцовых трэнераў і спартсменаў. Як адзначыў Уладзімір Церанцьеў, гэта ўнікальная падзея, якая сведчыць аб цеснай дружбе паміж краінамі.