Амбасадар Украіны ў Беларусі падчас візіту ў Віцебску: рэгіёнам трэба больш актыўна развіваць супрацоўніцтва
Кіраўнік проста з жалем канстатаваў, што Віцебская вобласць у параўнанні з іншымі знаходзіцца на ўскраіне беларуска-ўкраінскіх адносін. Пацвярджэннем таму стаў першы форум рэгіёнаў дзвюх краін, які прайшоў у мінулым годзе ў Гомелі, на якім прадстаўнікамі Віцебшчыны не было падпісана ніводнай пагаднення.
Незадаволенасць павольным развіццём дзелавых сувязяў выказаў і Уладзімір Пянін. Хоць у мінулым годзе адзначаўся значны рост таваразвароту і экспарту ва Украіну, але галоўным чынам ён складаўся за кошт паставак нафтапрадуктаў, звадкаваных газаў і бітумных сумесяў – 85% усяго экспарту. Купляем мы ў асноўным сою, макуху, скуру, кукурузу, гародніну, лекавыя сродкі. Рухі, вядома, ёсць. Аршанскі льнокамбінат адкрыў гандлёвыя дамы ў Адэсе і Роўна.
Ігар Кізім таксама адзначыў, што прыступкі да Свята-Успенскага кафедральнага сабора ў Віцебску выкладзены з жытомірскага каменя. А ў Жытомірскай вобласці з вялікай доляй верагоднасці знайшлі надмагільную пліту ўраджэнца Расоншчыны – аднаго з заснавальнікаў новай беларускай літаратуры Яна Баршчэўскага.
На сустрэчы ў аблвыканкаме гаварылася пра гарады-пабрацімы. Яны таксама будуць пашырацца. У прыватнасці, Віцебскі раён і Чугуеў Харкаўскай вобласці звязвае імя Ільі Рэпіна, які нарадзіўся ва Украіне, а пад Віцебскам меў дачу, дзе правёў некалькі летніх сезонаў і напісаў нямала шэдэўраў.
Цяпер Віцебскі раён і Чугуеў Харкаўскай вобласці гатовыя стаць гарадамі-пабрацімамі. Магчыма, гэтаму прыкладу рушыць услед і Віцебск, у якога пакуль няма горада-партнёра ва Украіне.
Не вельмі актыўны і бізнес. На тэрыторыі вобласці зарэгістравана 27 арганізацый з удзелам украінскага капіталу. Уладзімір Пянін акцэнтаваў увагу на тым, што Віцебшчына адкрыта для ўкраінскіх інвестараў. Сумесныя праекты можна рэалізоўваць і ў абласным цэнтры, і ў Оршы, Полацку, Наваполацку. Перспектыўным ён бачыць супрацоўніцтва ў аграрна-прамысловым сектары. І такія прыклады ёсць, у прыватнасці, у Бешанковіцкім раёне.
Пасол запрасіў прадстаўнікоў Віцебшчыны прыняць удзел у II Форуме рэгіёнаў Беларусі і Украіны, які пройдзе ў кастрычніку ў Жытоміры. Як падкрэсліў Ігар Кізім, рэгіянальнае супрацоўніцтва выходзіць на першы план і ў сувязі з тым, што ва Украіне ідзе працэс дэцэнтралізацыі.
Са свайго боку намеснік старшыні аблвыканкама адзначыў, што чакае ўкраінскіх бізнесменаў і патэнцыйных інвестараў на міжнародным эканамічным форуме «Інавацыі. Інвестыцыі. Перспектывы», які адбудзецца ў Віцебску 16-17 мая.
Ігар Кізім падчас візіту ў Віцебск прыняў удзел у адкрыцці ў абласным краязнаўчым музеі выстаўкі «Украіна ў Другой сусветнай вайне».
Экспазіцыя, арганізаваная Міністэрствам замежных спраў і Нацыянальным музеем гісторыі Украіны, раней была прадстаўлена ў Брэсце і Мінску.
На 45 стэндах размешчаны фатаграфіі і дакументы, якія распавядаюць пра подзвігі ўкраінцаў у гады вайны і пра страты, якія панесла краіна. Украіна страціла больш за 10 млн сваіх сыноў і дачок, з іх 5,5 млн – мірныя грамадзяне.
– Сёлета Украіна і Беларусь будуць адзначаць адну памятную дату – 75-годдзе вызвалення ад нямецка-фашысцкіх захопнікаў. Вялікай цаной нашым народам дасталася Перамога. Мы не павінны забываць сваю агульную гісторыю і гатовы ў гарадах Украіны прадстаўляць аналагічныя выставачныя праекты, якія распавядаюць пра беларусаў, што змагаліся з ворагам, – сказаў Ігар Кізім.
