Амбасада Чэхіі перадала на Віцебшчыну 47 медалёў за вызваленне Чэхаславакіі

Больш за дваццаць гадоў мінула, як не стала ў Цэнтральнай Еўропе краіны з такой назвай. Тым больш прыемна, што ў Чэхіі і Славакіі памятаюць: менавіта савецкі народ 70 гадоў таму прынёс ім вызваленне ад фашызму. Ветэранам Вялікай Айчыннай вайны, якія прымалі ўдзел у жорсткіх баях на яе тэрыторыі, днямі былі ўручаны юбілейныя медалі ў гонар гэтай знамянальнай даты.

Усяго пасольствам Чэхіі ў Беларусі на Віцебшчыну было перададзена 47 медалёў. 41 удзельнік тых падзей пражывае ў абласным цэнтры, трое – у Полацку, двое – у Оршы, адзін ветэран жыве ў Бешанковічах. Медаль у гонар 70-годдзя вызвалення Чэхаславакіі Івану Андрэевічу Кандрацюку 25 лістапада ўручылі ў адміністрацыі Першамайскага раёна Віцебска. Нягледзячы на ​​салідны ўзрост, ветэран поўны сіл і энергіі.

Артур Мацеюн, «Віцебскія весці».