Постаўскі малочны завод у красавіку запусціць другую лінію па вытворчасці казеіну

1 красавіка, Віцебск /Вольга Багачова - БЕЛТА/. ААТ "Пастаўскі малочны завод" запусціць у красавіку другую лінію па вытворчасці казеіну, паведамілі карэспандэнту БЕЛТА на прадпрыемстве. Абсталяванне беларускай вытворчасці коштам каля Br150 млн. будзе ўстаноўлена ў рэканструяваным будынку былой кацельні, дзе цяпер завяршаюцца будаўнічыя работы, а паралельна з імі вядзецца мантаж і ўстаноўка казеінавай лініі. Магутнасць новага абсталявання складае 900 кг прадукцыі ў змену, дзеючай лініі - 600 кг у змену. Пашырэнне вытворчасці казеіну звязана з развіццём прадпрыемства і павелічэннем яго магутнасцей у цэлым, адзначылі спецыялісты. Так, цяпер на заводзе вядзецца маштабная рэканструкцыя, у выніку якой магутнасці цэха па выпуску суцэльнамалочнай прадукцыі вырастуць на 45% да 17,5 тыс.т у год, пашырыцца асартымент выпускаемай прадукцыі, у прыватнасці, групы кісламалочных прадуктаў. У найбліжэйшы час прадпрыемства плануе прыступіць да рэканструкцыі трансфарматарнай падстанцыі, а ў другім паўгоддзі - да мадэрнізацыі ачышчальных збудаванняў. Інвестыцыі ў тэхпераўзбраенне завода ў гэтым годзе складуць каля Br4 млрд. За студзень-люты прадпрыемства выпусціла прадукцыі на Br4,4 млрд., або 123% да аналагічнага перыяду мінулага года. Выпрацавана 123 т сыроў (135%), каля 2 тыс.т суцэльнамалочнай прадукцыі (114%), 78 т жывёльнага масла (165%), 49 т казеіну (134%). Удзельная вага экспарту ў агульным аб'ёме рэалізацыі займае каля 50%. За два месяцы 2009 года на экспарт было пастаўлена прадукцыі на $694 тыс., што на 7,4% больш, чым у студзені-лютым мінулага года. Прадпрыемства заснавана ў 1963 годзе, рэарганізавана ў ААТ у 1998-м. Спецыялізуецца на вытворчасці сыроў, суцэльнамалочнай прадукцыі, казеіну, у невялікай колькасці выпускае марозіва, маянэз - усяго каля 40 найменняў прадукцыі.-0-