Павышэнне прэстыжу аграрных прафесій дазволіць вырашыць кадравае пытанне ў сельгасарганізацыях вобласці
Пачалося яно азнаямленнем з матэрыяльна-тэхнічнай базай гэтай адной з найбуйнейшых на Віцебшчыне профільнай установы адукацыі і выставай дасягненняў абласнога ПТВ.
Як падкрэсліў Мікалай Шарснёў, стаіць мэта асучасніць праграму падрыхтоўкі сельгаскадраў, кансалідаваўшы намаганні зацікаўленых бакоў у ключавых момантах гэтага шматграннага пытання: патрэбы ў спецыялістах і забяспечанасці імі, прафарыентацыі, якасці навучання, камплектаванні ўстаноў адукацыі, размеркаванні і асемяненні моладзі на вёсцы – з улікам скарачэння бюджэтных выдаткаў і накіравання зэканомленых сродкаў на развіццё вытворчасці.
Асновай рашэння архіскладанай праблемы павінна стаць павышэнне прэстыжу аграрных прафесій. У сувязі з гэтым кіраўнік вобласці паведаміў, што дадзена даручэнне ўдвая павялічыць зарплату спецыялістам жывёлагадоўлі.
Забяспечанасць кіруючымі спецыялістамі ў абласным АПК – 94%, кадрамі рабочых прафесій – 96,4%. Не хапае 1160 трактарыстаў-машыністаў, кіроўцаў, электрагазазваршчыкаў, аператараў машыннага даення і інш.
Па словах старшыні камітэта па сельскай гаспадарцы і харчаванні аблвыканкама Івана Фёдарава, аналіз сведчыць аб тэндэнцыі да скарачэння дадатковай патрэбы ў працоўных рэсурсах да 2027 года.
Самымі запатрабаванымі будуць ветурачы, заатэхнікі, ветфельчары, трактарысты-машыністы, аператары машыннага даення. За 5 гадоў замацаванасць маладых спецыялістаў вырасла на 6,5% і складае 53,5% ад усіх выпускнікоў – уладальнікаў сельскагаспадарчых прафесій.
Лепш, чым у іншых, абстаноўка ў Верхнядзвінскім, Глыбокскім, Лепельскім, Полацкім раёнах. Больш за палову размяркоўваецца па месцы жыхарства бацькоў. Тут пачатак мэтавага навучання работнікаў для АПК. Аднак 97 са 167 дагавораў летась былі заключаны камітэтам па сельскай гаспадарцы, гэта значыць не маюць прамога дачынення да канкрэтных раёнаў і арганізацый. І рэктар Віцебскай ветэрынарнай акадэміі Мікалай Гаўрычэнка пацвердзіў, што ёсць раёны, дзе не аформілі ніводнага мэтавага накіравання ў ВГАВМ, хоць конкурсы нават на платную форму навучання ў ВНУ растуць.
Падрыхтоўка сельгаскадраў ідзе ў 12 установах вобласці, рабочых прафесій – па 35 адзінкавых кваліфікацыях. Пасля ўзгаднення з Мінадукацыі будуць адкрыты 5 новых спецыяльнасцей узроўню ССА.
Каб дасягнуць балансу ў падрыхтоўцы кадраў і вакансіях для іх размеркавання, у 2016-м пачата пераарыентацыя Полацкага аграрна-эканамічнага каледжа на іншыя сферы эканомікі, у 2017-м рэарганізаваны Гарадоцкі і Лепельскі аграрна-тэхнічныя каледжы, гэта ж цяпер неабходна правесці ў Аршанскім раёне.
Зыходзячы з сітуацыі, упраўленне адукацыі аблвыканкама прапанавала схему ўзаемадзеяння зацікаўленых бакоў па падрыхтоўцы сельгаскадраў на доўгатэрміновую перспектыву. Такім чынам. Прафарыентацыя ў раёнах забяспечвае накіраванне не менш за 45% выпускнікоў 9-х класаў у ПТА.
Сельгасарганізацыі з профільнымі навучальнымі ўстановамі па магчымасці заключаюць трохбаковыя дагаворы на навучанне, якія прадугледжваюць выплату стыпендыі навучэнцам і адпрацоўку па размеркаванні. Пры наборы доля прэтэндэнтаў на мэтавае навучанне павінна стаць максімальнай.
Навучальныя ўстановы забяспечваюць якасную падрыхтоўку спецыялістаў па масавых прафесіях. У сувязі з гэтым – унесці прапанову ў Саўмін аб бязвыплатным уладкаванні ў буйных аграрных каледжах сучасных лабараторый з перадачай вытворцамі ўзораў новага абсталявання і тэхнікі.
Так, у Гарадоцкім каледжы разам з Кіраўскім трактарным заводам Ленінградскай вобласці да 1 верасня павінны стварыць лабараторыю і клас, а ў перспектыве абсталяваць дыягнастычную станцыю і СТА. Гэтыя пытанні прапрацоўваюцца з МТЗ. Тут магчыма і зімовая перападрыхтоўка кадраў АПК.
Далей вызначаюцца буйныя прадпрыемствы, якія сумесна з навучальнай установай забяспечаць аплачваную (за кошт прадпрыемства, зыходзячы з выкананых аб'ёмаў работ) вытворчую практыку для дзвюх-трох груп навучэнцаў, а таксама кароткатэрміновую стажыроўку майстроў вытворчага навучання, вырашыўшы неабходныя для гэтага жыллёвыя пытанні.
Гендырэктар ГА «Віцебскі канцэрн «Мяса-малочныя прадукты» Віктар Славецкі запэўніў, што сельгаспрадпрыемствам інтэграцыйных структур па сілах арганізаваць эфектыўную практыку для будучых работнікаў АПК.
Па сведчанні дырэктара Гарадоцкага каледжа Уладзіміра Шыцькі, гэта выдатна атрымліваецца ў сельгаспрадпрыемства «Мазалавагаз», пачата праца ў гэтым напрамку з сельгаспрадпрыемствам «Рудакова».
Па выніках размеркавання такія прадпрыемствы выбіраюць сабе лепшых выпускнікоў. Райвыканкамам, верагодна, варта разгледзець магчымасць поўнага або частковага вызвалення іх калектываў ад выплаты мясцовых падаткаў.
Прапанова Мінадукацыі – аб павелічэнні вытворчай практыкі пры падрыхтоўцы спецыялістаў для АПК да 6-8 месяцаў. Рэзервы: скараціць канікулы з 8 тыдняў да 6 (бо многія навучэнцы ў гэты час уладкоўваюцца на падпрацоўку), вывучэнне сумежных спецпрадметаў, колькасць кансультацый і факультатываў, выключыць з праграмы непрафільныя курсы.
У адпаведнасці з нарматыўнымі дакументамі ў Гарадоцкім каледжы па групе кваліфікацыі трактарыст катэгорыі А, B, D, кіроўца катэгорыі C, слесар па рамонце сельгасмашын 3-га разраду павялічана практыка з 340 да 628 гадзін, але для асваення ўсяго комплексу работ (ад пасяўной да ўборачнай і пад'ёму зябi) і тэхнікі трэба больш.
– А паколькі наваспечаныя кадры праз месяц часта сыходзяць у войска і больш не вяртаюцца, бо тэрмін адпрацоўкі да таго часу мінае, прапануецца звярнуцца да кіраўніка дзяржавы з прапановай увядзення адтэрміноўкі ад службы на два гады для прызыўнікоў, якія працуюць у АПК па размеркаванні. Сістэма адукацыі Віцебшчыны гатова пайсці на падрыхтоўку і рэалізацыю эксперыментальных планаў па аператыўным змяненні структуры навучання сельгаскадраў, – сказаў начальнік упраўлення адукацыі аблвыканкама Дзмітрый Хома.
Нарада спрыяла напрацоўцы прапаноў, якія павінны даць эфект. Губернатар нацэліў яго ўдзельнікаў на сінхронныя дзеянні па стварэнні гнуткай сістэмы падрыхтоўкі, перападрыхтоўкі і павышэння кваліфікацыі кадраў для АПК, прафесійнай кампетэнтнасці педработнікаў, аптымізацыі сеткі профільных устаноў адукацыі. Ад гэтага залежыць сельскагаспадарчы аблічча поўначы краіны ў найбліжэйшай перспектыве.