Пажылыя жыхары Віцебскай вобласці могуць разлічваць на дапамогу сацыяльных службаў, асабліва ў перыяд неспрыяльнай эпідэміялагічнай сітуацыі.
Пра гэта распавяла галоўны спецыяліст упраўлення сацыяльнай падтрымкі і стацыянарных устаноў камітэта па працы, занятасці і сацыяльнай абароне аблвыканкама Святлана Казлова.
— З канца сакавіка камітэтам па працы, занятасці і сацыяльнай абароне арганізавана дзейнасць па прафілактыцы COVID-19 для абароны пажылых людзей (у вобласці іх 276 тысяч, з іх каля 20 тысяч адзінокіх і каля 140 самотна пражываючых), — патлумачыла Святлана Віктараўна. — З гэтага часу арганізавана дастаўка прадуктаў, медыкаментаў, прадуктаў першай неабходнасці. Яе ажыццяўляюць работнікі тэрытарыяльных цэнтраў, прадстаўнікі Беларускага Таварыства Чырвонага Крыжа, БРСМ, сельскіх выканкамаў, прафсаюзных арганізацый, аддзяленняў сувязі. Наладжваецца супрацоўніцтва з гандлёвымі арганізацыямі. За ўвесь перыяд ужо выканана звыш 10000 заявак.
Заяўку на аказанне падобных паслуг можна падаць у тэрытарыяльны цэнтр сацыяльнага абслугоўвання насельніцтва па месцы жыхарства. На працягу двух-трох дзён тавары першай неабходнасці даставяць людзям непрацаздольнага ўзросту (у першую чаргу ветэранам, інвалідам 1-й і 2-й груп, а таксама тым, хто знаходзіцца на самаізаляцыі).
На сайтах тэрытарыяльных цэнтраў арганізавана анлайн-кансультаванне, размешчаны рэкамендацыі па адаптыўнай фізічнай культуры для асоб старэйшага ўзросту, прафілактыцы COVID-19. Супрацоўнікі Віцебскага медыцынскага дзяржаўнага ўніверсітэта ажыццяўляюць метадычнае суправаджэнне пажылых грамадзян, якія маюць магчымасць навучацца, не выходзячы з дома, зайшоўшы ў адпаведныя раздзелы сайтаў. У кожным ТЦСАН працуе колл-цэнтр, куды можна патэлефанаваць па праблемным пытанні.