Практычныя аспекты дзяржаўнай дапамогі сем'ям, якія выхоўваюць дзяцей з інваліднасцю, абмеркавалі ў Богушэўску
Дзесяць мам з такіх сем'яў, многія – разам з дзецьмі, прыехалі на мерапрыемства з розных раёнаў вобласці. Іх прыемна ўразіла ўбачанае ў сацыяльнай установе. Быт, харчаванне, пражыванне, вольны час дзяцей – на годным узроўні. У распараджэнні выхаванцаў – інтэрактыўны пол, разумнае лагапедычнае люстэрка, мноства развіваючых і навучаючых настольных гульняў, пакоі-сімулятары: кухня, сталовая, гасцёўня, бытавая, пошта, вакзал, крама.
Не сакрэт, што парадку 30 % выхаванцаў дома-інтэрната маюць парушэнні апорна-рухальнага апарату. Для навучання іх хадзьбе, развіцця дробнай маторыкі рук, падтрымання патрэбных груп цягліц у тонусе прымяняюць усемагчымыя прыёмы: ад трэнажораў да заняткаў лячэбнай фізкультурай. Праз месяцы ўпартай працы інструктараў, медперсоналу і дзяцей яны робяць першыя самастойныя крокі!
Працоўная тэрапія – яшчэ адзін з фактараў, якія ўплываюць на павышэнне самаацэнкі дзяцей. Навучыўшыся рабіць нешта сваімі рукамі, яны адчуваюць сваю карыснасць, працу ўспрымаюць як крыніцу дабрабыту і самарэалізацыі. Вязанне на спіцах і кручком, вышыўка, карціны з бісеру, фотадрук на кубках і адзенні – розныя віды рукадзелля пад сілу тутэйшай моладзі. Хлопцы ахвотна займаюцца ў сталярнай майстэрні, дзяўчаты – у швейнай. Нярэдка атрыманыя тут навыкі для дзяцей, адноўленых у дзеяздольнасці, становяцца асновай будучай прафесіі.
Бацькам важна было ўбачыць гэта на свае вочы і расказаць сем'ям па месцы жыхарства. Бо ўстанова аказвае паслугу сацыяльнага перадыху, а з красавіка гэтага года на яго базе дзеці могуць прайсці рэабілітацыю.
– Па рашэнні аблвыканкама паслугу рэабілітацыі ў доме-інтэрнаце аказваюць бязвыплатна, – падкрэсліла намеснік старшыні камітэта па працы, занятасці і сацыяльнай абароне аблвыканкама Вера Астапенка. – На тэрмін да 30 дзён адзін раз у год дзіця-інвалід можа быць змешчана ва ўстанову, дзе яно кругласутачна будзе знаходзіцца пад наглядам персаналу. Дзіця ў гэты перыяд зможа скарыстацца базай, прадастаўленай у распараджэнне выхаванцаў для заняткаў лячэбнай фізкультурай, развіцця кагнітыўных здольнасцей, набыцця і развіцця бытавых навыкаў. Важная магчымасць мець зносіны з аднагодкамі і дарослымі – не членамі сям'і, гэта спрыяе адаптацыі да грамадства.
У аддзяленні рэабілітацыі прадугледжана 10 месцаў для дзяцей з 4-й і 3-й ступенню страты здароўя. У цяперашні час прапрацоўваецца пытанне аб пашырэнні катэгорый дзяцей з інваліднасцю, якія змогуць прайсці рэабілітацыю, і аб адкрыцці аддзялення для рэабілітацыі дзяцей не толькі з псіхафізічнымі, але і з агульнымі захворваннямі.
Акрамя таго, дом-інтэрнат прадастаўляе паслугу сацыяльнага перадыху сем'ям, якія выхоўваюць дзяцей з інваліднасцю. На перыяд да 56 дзён можна змясціць дзіця ва ўстанову, каб у гэты час вырашыць назапашаныя ў бацькоў пытанні.
За атрыманнем накіравання на перадых, як і на рэабілітацыю, варта звяртацца ў ТЦСАН па месцы жыхарства.
Зацікаўленая размова адбылася падчас круглага стала. Так, галоўны ўрач абласнога дзіцячага рэабілітацыйнага цэнтра «Ветразь» Сяргей Петухоў завастрыў увагу на створанай у Беларусі сістэме медыцынскай рэабілітацыі дзяцей-інвалідаў. Яе лячэбна-рэабілітацыйны этап пачынаецца, калі дзіця яшчэ знаходзіцца ў бальніцы. Наступны этап, ранняй стацыянарнай медыцынскай рэабілітацыі, надыходзіць адразу пасля выпіскі, калі дзіця трапляе ў аддзяленне рэабілітацыі абласнога дзіцячага клінічнага цэнтра. Затым надыходзіць амбулаторны этап, калі бацькі могуць выкарыстоўваць магчымасці медустаноў па месцы жыхарства – кабінетаў лячэбнай фізкультуры, масажу, фізіятэрапіі, не чакаючы пуцёвак у санаторыі. На жаль, часта дарослыя не звяртаюцца да гэтых механізмаў і надаюць недастаткова ўвагі этапу хатняй рэабілітацыі. Затым, на наступным – стацыянарным этапе рэабілітацыі дзяржустановам даводзіцца пачынаць аднаўленне дзіцяці нанова.
Удзельнікі дыялогавай пляцоўкі, у тым ліку, акрамя бацькоў, былі прадстаўнікі абласнога дзіцячага клінічнага цэнтра, прадстаўніцтва абласнога ўпраўлення Рэспубліканскага цэнтра па аздараўленні і санатарна-курортным лячэнні, дзіцячага рэабілітацыйна-аздараўленчага цэнтра «Жамчужына», Віцебскага гарадскога цэнтра карэкцыйна-развіваючага навучання і рэабілітацыі, Віцебскага рэспубліканскага ўнітарнага прадпрыемства «Фармацыя», рэлігійнай місіі дабрачыннага каталіцкага таварыства «Карытас», сышліся ў меркаванні, што для паляпшэння стану і якасці жыцця дзяцей з інваліднасцю неабходна выкарыстоўваць усе магчымасці.
"Віцебскія весці"