Права арэнды зямлі пад кола агляду прададзена на аўкцыёне ў Віцебску амаль за Br120 тыс.
Інтарэс да лота праявілі тры ўдзельнікі, аднак адзін з іх спазніўся на заключную рэгістрацыю і па ўмовах аўкцыёну не быў дапушчаны да ўдзелу ў таргах. Пераможца вызначыўся на 77-м кроку аўкцыёну, калі цана продажу перавысіла пачатковую амаль у 44 разы. Па словах яго прадстаўніка, інвестар з'яўляецца членам рэспубліканскай асацыяцыі вытворцаў і партнёраў індустрыі забаў.
Аўкцыён па продажы правоў арэнды зямельнага ўчастка пад размяшчэнне маштабнага забаўляльнага збудавання арганізуецца ў Віцебску ўпершыню. У склад лота ўключаны ўчастак гарадской тэрыторыі плошчай 600 кв.м на Алеі воінскай славы, якая размешчана каля мемарыяльнага комплексу ў гонар савецкіх воінаў-вызваліцеляў, партызан і падпольшчыкаў Віцебшчыны на плошчы Перамогі. Па ўмовах аўкцыёну зямля перадаецца ў карыстанне на 10 гадоў з магчымасцю пралангацыі дагавора арэнды. Пераможца абавязваецца аплаціць кошт прадмета аўкцыёну на працягу наступных трох рабочых дзён, у адваротным выпадку яму пагражаюць штрафныя санкцыі ў памеры 50 базавых велічынь (1 БВ - Br27), адзначыла старшыня аўкцыённай камісіі Таццяна Пракапенка.
Па ўмовах таргоў кола агляду павінна быць дыяметрам не менш за 30 м з зачыненымі кабінкамі ёмістасцю не менш за чатыры чалавекі, абсталявана ілюмінацыяй. На яго ўстаноўку адводзіцца не больш за дзевяць месяцаў з моманту падпісання дагавора арэнды. Арэндная плата ў перыяд праектавання і мантажу аб'екта вызначана ў памеры адной базавай арэнднай велічыні.
Шэраг умоў аўкцыёну датычыцца выканання правілаў па забеспячэнні прамысловай бяспекі атракцыёнаў, уключаючы наяўнасць спецыяльна навучанага персаналу па арганізацыі работы і абслугоўванні аб'екта. Часавы рэжым работы атракцыёну ўстаноўлены да 23.00, пры гэтым музычнае суправаджэнне дапускаецца да 21.00. Арандатар абавязваецца выконваць патрабаванні санітарных нормаў, правілаў і гігіенічных нарматываў.