Святочная літургія з нагоды Дабравешчання прайшла ў Віцебску
Гэтае свята ўстаноўлена ў памяць пра дзень, калі Дзеве Марыі з'явіўся пасланы Богам Архангел Гаўрыіл і абвясціў: "Не бойся, Марыя, бо ты знайшла ласку ў Бога. Ты народзіш Сына і дасі яму імя Ісус. Ён будзе вялікі і назавецца Сынам Усявышняга, і Царству Яго не будзе канца".
Благавешчанне лічыцца адным з найважнейшых і найбольш шанаваных дзён у праваслаўным календары. Яго называюць малой Пасхай, найвялікшым у Бога святам. У Віцебску галоўныя набажэнствы, якія ўзначаліў архіепіскап Дзмітрый, прайшлі ў храме, узведзеным у XII ст. у гонар Благавешчання Прасвятой Багародзіцы. Гэты ўнікальны помнік старажытнарускай архітэктуры называюць крыштальным і кананічным храмам старажытнай Русі. Менавіта да яго ў нядзельны ранак прыйшлі жыхары горада падзяліцца радасцю і разам адзначыць светлы дзень, які абвясціў свету добрую вестку.
Пасля ўрачыстай літургіі і хрэснага ходу вакол храма да прысутных звярнуўся кіраўнік епархіі. Архіепіскап пажадаў усім дабра, любові, цярпення і крэпасці веры. У святочным дзеянні прынялі ўдзел старшыня абласнога Савета дэпутатаў Уладзімір Церанцьеў, намеснік старшыні аблвыканкама Уладзімір Пянін, іншыя прадстаўнікі ўлады. Разам са святарамі яны выпусцілі ў неба белых галубоў. Прыгожы звычай сімвалізуе душу, якая ўзлятае, вызваленне ад граху, радасць духоўнага абнаўлення.
Згодна з народнымі павер'ямі, Дабравешчанне знамянуе прыход вясны, калі сам Гасподзь благаслаўляе зямлю на пладавітасць, гэта значыць на дабрабыт чалавечы. У гэты дзень нашы продкі заклікалі вясну песнямі, пяклі птушак з цеста – жаваранкаў і падкідвалі іх уверх са словамі: «Жаваранкі, жаваранкі, прыляціце, з сабой вясну прынясіце!». Паводле існаваўшага павер'я, якая надвор'е на Дабравешчанне – такое яно будзе і на Вялікдзень.
